Kukkunersiuisut sakkortuumik isornartorsiuisut: Isumaqatigiissutit "attartortitsisumut iluanaarutaalluartut"

Kommuneqarfik Sermersuumi ineqarnermut tunngatillugu suliap qulaajaaffigineqarneranut atatillugu kommunip ingerlatsisimanera misissuiffigineqarsimavoq.

Deloitte misissuisimavoq, nalunaarusiamilu maanna tamanut saqqummiunneqarsimasumi kommuni arlalitsigut isornartorsiorneqarluni.

Suliaq naatsumik oqaluttuaralugu, kommuni inissianik namminersortunik attartoriarluni innuttaasunut sulisunullu inissianik attartukkanik attartortitseqqiisarsimavoq.

Nalunaarusiami ilaatigut inerniliunneqarpoq, namminersortutut aningaasaliissuteqartartunut isumaqatigiissutigineqarsimasut ilaat aningaasaliissuteqarsimasunut iluanaarutaalluarsimasut - ilaatigut kommunip pisussaaffigisimammagu inissiat attartortinneqartut tiguneratut isikkoqartillugit attartortitsisumut tunniunnissaat.

Tassa attartornermi isumaqatigiissutit minnerpaamik ukiuni qulini atuuttussaagaluarpataluunniit kommuni inissianik attartorunnaarpat, kommunip inissiat nutaatulli isikkoqalersillugit nutartissavai.

Suliariumannittussarsiuussisoqaranilu qularnartunik taarsigassarsisoqarsimasoq

Kukkunersiuisut aamma Siumumeersup Inga Dora G. Markussenip uparuarsimasaanik sammisaqarsimapput. Tassalu attartonermik isumaqatigiissutit atorunnaarpata inissianik attartortut qanoq pineqarniarnersut pillugu periusissiortoqarsimannginnera.

Kukkunersiuisunit aamma uparuarneqarsimavoq, isumaqatigiissutigineqarsimasut suliariumannittussarsiuunneqarsimannginnerat kiisalu pisortat suliniutinut atatillugit taarsigassarsisimanerat malittarisassat malillugit pisimannginnera. Pisortat sanaartortoqarnissaanut 131 millioner koruuninik taarsigassarsisimapput.

Kukkunersiuisut tamatuma saniatigut takussutissaqannginnerarpaat, periuserineqarsimasumi inatsit malinneqarsimanersoq pillugu ingerlatsivimmit eqqarsaasersortoqarsimaneranik:

- Aaqqiissutiginiaaq inatsimmut naapertuunnersoq aamma/imaluunniit aaqqissuussamut atatillugu inerlatsinissamut piumasaqaasiortoqarnissaanik suliaqartoqaranilu politikkikkut suliaqartoqarsimanersoq 2015-imi imaluunniit 2016/17-imi takuneqarsinnaanngilaq. Aaqqiissutiginiakkamulluunniit atatillugu Naalakkersuisunik oqaloqateqartoqarsimanersoq uppernarsaateqartoqarani, nalunaarusiami allassimavoq.

Deloittemit isornartorsiorneqartut aamma kommunip inissianik attartornissamik isumaqatigiissummut atatillugu nammineq nalilersorsimasai:

• Isumaqatigiissutit arlaannaalluunniit suliariumannittussarsiuunneqarsimanngillat, suliariumannittussarsiuussinikkummi kommunip pitsaanerpaamik akigititassat, inissiat atorneqarsinnaanerat pitsaassusaallu qulakkeertussaagamigit. Akerlianik isumaqatigiissuteqartoqarsimavoq niuerfimmi isumaginnissinnaanik ujaasinikkut aamma inissianik attartortitsinissamik soqutiginnittut saaffiginnissimanerisigut
• Isumaqatigiissutit marluk (attartortitsisumut ataatsimut isumaqatigiissutit) attartortitsisumut qaqutigoortumik iluanaarutaasimapput, tassa:
  • attartortoq illup silataanik aserfallatsaaliuisussaagami,
  • attartornerup tiguneratut (nutaajuneratut) isikkoqartillugu attartugaq utertinneqartussaammat,
  • isumaqatigiissutit ukiut qulit sinnerlugit atorunnaarsinneqarsinnaanngimmata (attartartukkap aappaa atorunnaarneqassappat ukiut marluk sioqqullugit nalunaarutigineqartussaalluni)
  • attartornerup aallartinneranit ukiut tallimat sinnerlugit qaangiunnerani attartukkat pisiarinissaannut isumaqatigiissuteqartoqarsimavoq. Tamatuma kinguneranik attartortitsisoq akikillisaaffigineqarluni pisortanut taarsigassarsisinnaavoq - tunniussisoqarnissaatalu tungaanut erniaqanngitsunik akilersuisinnaalluni.
• Isumaqatigiissutigineqarsimasut marluk atsiorneqareersut aatsaat politikkikkut suliarineqarsimapput. Isumaqatigiissutit marluk pineqartut piffissami sivisuumi isumaqatigiissuteqartoqanngereersoq 2019-ip aallartinnerani isumaqatigiissutigineqarsimallutik. Isumaqatigiissutaasimasuni isumaqatigiissutit marluk taakku pineqartut Missingersuutinut inatsit atuutilereersoq kisimik isumaqatigiissutaasimapput.
• Pisortat taarsigassarsiaat isumaqatigiissutinut attuumassuteqartut inissianut aningaasaliissuteqarnissaq pillugu nalunaarummut akerliupput, malittarisassammi malillugit pisortat ineqarnermut aningaasaliissuteqassappata namminersortunit attartorneq pillugu nalunaarummi aalajangersakkat naapertorlugit attartornermi akiliutissaq aalajangersarneqartussaammat.
• Isumaqatigiissutigineqarsimasunit aqqaneq-marluusunit tallimat Iserit A/S-imut suli tunniunneqanngillaq, naak tamanna politikkikkut aalajangiunneqareeraluartoq.
• Attartornissamik isumaqatigiissutit atorunnaarpata inissianik attartortunut neqeroorutit iliuuseqarfigineqarnissaannut (suli) periusissiortoqarsimanngilaq.

Kukkunersiuisup aamma nalunaarusiamini kommunip aningaasaliissuteqartartunik isumaqatigiissutigisimasai takussutissaliorsimavaai: