Kukkunersiuinermut ataatsimiititaliaq: Kielsenip benzinamik atuinera ukkanneqarpoq
Kim Kielsenip, Namminersorlutik Oqartussanit akeqanngitsumik biileqartitaanermini benzinamik atuinermini ingasaassinaveersaannginnera Kukkunersiuinermut ataatsimiititaliap naammagisimaanngilaa.
Namminersorlutik Oqartussat akiligaannik, Doris J. Jensen, benziinamik atuinermi naammaginartumik sipaarsinnaassuseqanngitsutut kisimiinngilaq.
Taamatut Kukkunersiuinermut Ataatsimiititaliaq, ukiuni pingasuni kingullerni Naalakkersuisuusut benziinamik atuinerannut tunngasumik misissuititsereernerminni naliliipput.
Aningaasartuutit tamarmik qulaajarneqartut
Naalakkersuisuni ilaasortat akeqanngitsumik biileqartitaanerannut tunngatillugu Deloitte 2014-imiit 2017-ip naanerata tungaanut misissuisimavoq. Misissuinermi benziinamik atuineq misissorneqanngilaq, aammali aaqqissuussinermut, forsikringinut akitsuutinullu aningaasartuutit qulaajarneqarlutik.
Kukkunersiuinermut Ataatsimiititaliaq isumaliutissiissummini ima allappoq:
”Naalakkersuisoqarfinni ataasiakkaani orsussamik atuinerujussuup misissuinermi paasineqarnera tunngavigalugu sipaarniarnissaq eqqarsaatigalugu maleruagassat atuuttut naammattutut isigineqarsinnaanngitsut ataatsimiititaliaq isumaqarpoq. Sipaarniarnissap annertunerusumik isiginiarneqarnissaa Nunatta Karsiata kukkunersiuisuanit aamma erseqqissaatigineqarpoq”.
Ataatsimit amerlanerupput tassa Dorisiinnaanngilaq
Kukkunersiuinermut ataatsimiititaliaq allappoq “naalakkersuisoqarfinni ataasiakkaani”, aqqinilli taasinani kikkut sipaarniarnermik naammattumik takutitsisimannginnersut.
Deloittelli misissuinera, Kukkunersiuinermut Ataatsimiititaliamut februaarip 16-ani 2018-imili nassiunneqarsimasoq, atuarluaraanni arlallit erserput.
Doris J. Jensen septembarip aallaqqaataani 2015-imili benziinamut akiliummik atuilluarsimavoq. Piffissami tassani Peqqissutsimut Naalakkersuisutut kingornalu Ilinniartitaanermut Naalakkersuisutut atuuffeqarpoq.
2017-mi benziinamik atuisimaneq Doris J. Jensenilu pillugit naalagaaffiup akuerisaatut Deloittemi naatsorsuuserisoq Bo Colbe ima allappoq:
”Orsussamut atukkat sinneruttut 23.415 koruuninut naatsorsorneqarput, kontonut allanut assersuukkaanni atorneqartut amerlallutik, kontoni allani nalinginnaasumik 10.000 koruunit missaat atorneqartarmata”.
Kielsenip atuinera
Naalakkersuisuni ilaasortani, ukiumut 10.000 koruunit sinnerlugit benziinamik atuisartoq maanna kiserngoruttoq tassaavoq Kim Kielsen, tamanna allagaatinik takunnissinnaanermut qinnuteqarnerup kingorna Sermitsiaq.AG-p saqqummiutereerpaa. Kim Kielsenip benziinamut 13.000 koruuninik 2017-imut aningaasartuuteqarsimasoq, nutaarsiassaqartitsiviup allagaatini tigusimasaani allaqqavoq.
Kim Kielsenilli ukiuni pineqartuni benziinamik qanoq atuitigisimanera misissuinermi ersarissumik allaqqanngilaq, Siulittaasup Naalakkersuisoqarfiata ataani biilit arlallit naatsorsuutinut ilaatinneqarmata. Nassuiaatigineqarpoq betjentit biilerisai siulittaasoqarfiup biilinut aningaasartuutaanut ilaatinneqarmata. Biilit qassit pineqarnersut erseqqissaatigineqanngilaq.
Nakkutiginninnerulerneq
Sermitsiaq.AG-lli paasivaa, Kukkunersiuinermut ataatsimiititaliap Doris J. Jensenip benziinamik atuineranik nakkutiginerata saniatigut, Kim Kielsenip benziinamik atuinera, ingasaassinaveersaarnissaq sipaarnissarlu eqqarsaatigalugit, aamma nakkutiginerusimagaat.
Kukkunersiuinermut Ataatsimiititaliap ilanngullugu Kim Kielsen kaammattorsimavaat, “benziinamik atuinermut maleruagassanik misissuineq ingerlanneqalersoq uppernarsaaqqullugu – kinguarsaanertaqanngitsumillu tamanna pissasoq”, taamatullu misissuinermi inerniliussat 2019-imi upernaakkut ataatsimiilinnginnermi Kukkunersiuinermut Ataatsimiititaliamut saqqummiunneqassasut.
Deloittep misissuineranit erserpoq Naalakkersuisuusimasoq ataaseq, tassa Aningaasaqarnermut Naalakkersuisuumisoq Anda Uldum, 2015-imi ukiumut 10.000 koruunit sinnerlugit atuisimasoq. Anda Uldum benziinamut atuinera 2015-imi 15.000 koruunit missaanniippoq. Taassuma aningaasaqarnermut naalakkersuisuuffik Randi Vestergaard Evaldsenimut ingerlateqqippaa. Randi Vestergaard Evaldsen 2016-imi Naalakkersuisunngorami aalajangerpoq Namminersorlutik Oqartussat aningaasartuutinik artukkerumanagit, taamaammat akeqanngitsumik biileqartitaasarneq atunngilaa.
Marlunngornermi aappassaaneerinnissapput
Nunatta Karsiata naatsorsuutaanik aappassaaneerinninneq, Kukkunersiuinermut Ataatsimiititaliap isumaliutissiissutaanik imaqartoq, Inatsisartuni marlunngornermi novembarip 27-ani ingerlanneqassaaq.
Benzinkortimut tunngasut uani atuakkit:
Allaaserisat tamaasa uani takukkit