Skip to main content

Kukkunersiuinermut Ataatsimiititaliaq Kielsen pillugu: Isornarpoq ajornartorsiutitullu isigineqartariaqarluni

Nipisattassiissutit pillugit suliami Kukkunersiuinermut Ataatsimiititaliaq inerniliinermini Naalakkersuisut siulittaasua isornartorsiorpaa amerlanerusunik pisasseeqqinnermini aalajangiinermi peqataasinnaanermut apeqqut qaqinneqarsimanngimmat sakkortuumik uparuarneqarpoq, suliamilu paasissutissanik tunniussinaveersaarsimaneq sakkortuumik isornartorsiorneqarluni.

Kukkunersiuinermut Ataatsimiititaliaq qaammatini pingasuni sulereerluni, nipisattassiissutit amerlineqarneranni Naalakkersuisut Siulittaasuata, Kim Kielsenip. peqataasimanera, taamatullu angallammik pigisaminik atukkiussisimanera pillugu inerniliussaqarpoq. Ataatsimiititaliap sulinermini nalileeriaasiani, suliami naliliineq sakkortunerpaamut inissinneqarpoq.

Ataatsimiititaliap nassuiaataani inerniliinermi ima allassimavoq:

- Naalakkersuisut Siulittaasuata suliami matumani suliamut attuumassuteqarpallaarsinnaanermut apeqqummik eqqumaffiginnissimannginnera ataatsimiititaliap sakkortuumik uparuarpaa tamannalu Inatsisartunut immikkut maluginiaqqullugu (...) 

- Siulittaasup pisassiissutit amerlineqarnissaannik suliarinninnerup aallartinnginnerani suliamut attuumassuteqarpallaarsimasinnaaneq pillugu isumaliutiminik Naalakkersuisunut nalunaarfiginnissimannginnera ataatsimiititaliamit sakkortuumik uparuarneqarpoq. Aammattaaq Naalakkersuisut pisassiissutit pillugit siunnersuummik suliarinninnginneranni Naalakkersuisunut ilaasortat ilaasa suliamut attuumassuteqarpallaarsinnaanerannik nalilersuisoqarsimasungannginnera ataatsimiititaliamit isornartinneqarpoq (…)

Kukkunersiuinermut ataatsimiititaliaq

Pisortat ingerlatsinerat pillugu paasitinneqarsinnaatitaaneq pillugu inatsimmi suliamik suliarinninnermut peqataasinnaanermut malittarisassat qanoq maluginiarneqarsimanerat malinneqarsimatiginerallu ataatsimiititaliap suliamik matuminnga suliarinninnerani isiginiarneqarsimasoq, aallaqqaasiummi ersarissarneqarpoq.

Inatsisartut aalajangiissapput

Ataatsimiititaliaq tusagassiorfinnut nalunaarutimini erseqqissaavoq suliani ataatsimiititaliap suliarisaani, ataatsimiititaliaq eqqartuussisutut inississanngitsoq aalajangiinernillu tunniussissanani.

- Kukkunersiuinermut Ataatsimiititaliaq suliamik misissuinerminut atatillugu pissutsinik isornartorsiugassaqqissunik nassaassagaluarpat, qanoq pissutsit isornartuusinnaasut Kukkunersiuinermut Ataatsimiititaliamit uparuarneqartut Naalakkersuisunut ilaasortanut akisussaasunut naalakkersuinikkut kinguneqartinneqassanersut Inatsisartunit kingarna aalajangerneqartussaavoq. Suliap pineqartup pissutsit piviusut naapertorlugit torersumik pitsaasumillu qulaajaavigineqarnissaa ataatsimiititaliap suliassaraa.

Nassuiaat naapertorlugu sulineq oqittuinnaasimanngilaq, tamanna ataatsimiititaliap aamma erseqqissarpaa.

- Aammattaaq Naalakkersuisut allagaatinik ataatsimiititalianut tunniussinissaminnut piumassuseqannginnerat ataatsimiititaliamit ajornartorsiuterujussuartut isornartorujussuartullu isumaqarfigineqarpoq. Naalakkersuisut pissusilersornerat Inatsisartuni ataatsimiititaliat suliassaminnik, ilaatigut Naalakkersuisunik nakkutilliinermik imaqartunik isumaginnissinnaanerannut pisariaqanngikkaluamik akornusersuutaavoq, ataatsimiititaliaq allappoq.

Paasissutissanik killeqartumik tunniussineq ataatsimiititaliap sulineranut aamma Kammeradvokatip misissuineranut, juulimi naammassineqartumut, sunniuteqarsimavoq.  

Aningaasarsiat qassiuneri ilisimatitsissutigineqanngillat

Kammeradvokatip inerniliussinermini ilaatigut tunngavilersorpaa Kielsen suliami peqataasinnaannginnermut maleruagassanut malinnittutut nalilerpaa, suliami aningaasaqarnikkut iluanaarutissatut soqutigisai killeqarmata, erseqqissarluguli angallatip attartortinneranut aningaasartuutit matuneqarneranut paasissutissat pisimanagit.

Eqqartuussissuserisullu naatsorsuinera kukkunersiuinermut ataatsimiititaliap apeqquserpaa.

Naalakkersuisut Kammeradvokatillu allaffeqatigiittarsimanerat pillugu allagaatit ataatsimiititaliap tigusimannginnamigit, nalileruminaatsippaat attartortitsinermi isertitat kammeradvokatip qanoq ililluni naatsorsorsimasinnaanerai.

Kammeradvokat illuatungiusutut isikkoqarpoq

Naalakkersuisut piaaralutik Kammeradvokatimut killilimmik paasissutissiisimasinnaanerat ilimaginissaanut tunngavissaqarnani ataatsimiititaliaq allappoq, taamaattoq kammeradvokatip misissuineranut paasissutissat naammanngitsut tunniunneqarnerat sunniuteqarsimasinnaanerarlugu.

- Naalakkersuisulli Kammeradvokatimik allaffigeqateqarsimanerannik, taamatullu suliakkiutip oqaasertalerneqarsimanerata immikkualuuttortaanik ataatsimiititaliap paasitinneqarsinnaasimannginnerata inerneraa Kammeradvokatip ilisimasalittut oqaaseqaataata ilaatigut illuatungerisamit ilanngussatut iluseqalernera, allassimavoq.

Misissuinerup killilernera

Kielsenip angallataata inuussutissarsiutigalugu aalisarnermut atorneqarsinnaanermut pisariaqartunik uppernarsaateqarnersoq, aamma pisassiissutit amerlineqarnerisa nunatta karsianut qanoq sunniuteqassanersoq misissunngilai.

Tamanna misissorneqarumaarpoq biologit innersuussutaat qaangerlugu nipisattassiinerup kinguneranik nipisanniarneq MSC-mik meqqeqarunnaartinneqassappat. Suliaq pineqartoq ataatsimiititaliap uterfigiumaarpaa, pisariaqalissappat, allapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER