Skip to main content

Kukkunersiuinermut Ataatsimiititaliap Kielsen misissussavaa

Kim Kielsenip nipisanniartoqarnerata nalaani angallatini ikinngutiminut attartortitsisimanera Inatsisartuni Kukkunersiuinermut Ataatsimiititaliap misissuiffigilerpaa.

Naalakkersuisut Siulittaasuata, Kim Kielsenip nammineq aningaasaqarnikkut iluanaaruteqarsinnaanini tunngavigalugu nipisattassat amerlineqarnissaannut aalajangeeqataasimasutut taaneqareersorlu, Inatsisartuni kukkunersiuinermut ataatsimiititaliap suliaq misissuiffigilerpaa.

Nipisattassat qaffanneqaranissaannut isummernissamut tunngavissiissummik suliaqarneq pillugu ataatsimiititaliap Naalakkersuisut arlalinnik apeqquteqarfigissavai.

Misissuinerup inernera Inatsisartunut ingerlateqqinneqassaaq, taakkulu suliami kinguneqartitsisoqassanersoq aalajangissallugu.

Ikinngut ikiorneqarpoq

Kim Kielsen Qanoruumi pingasunngornermi pulaartorineqarpoq. Tassani oqaluttuarpoq angallatini ikinngutiminut nipisanniarluni aalisartumut aprilip 27-anit majip 19-ata tungaanut attartortissimallugu. Aqutsiveqarfinni Nuummi aamma Maniitsumi nipisattassat 204 tonsinik annertusineqarnissaat majip 12-ani akuerineqarpoq.

Kim Kielsen aalajangiineq peqataaffigaa. Siulittaasoq nammineq naapertorlugu angallatip attartortinneranut 27.000 koruunit akissarsissutigisimavai. Taamaattoq suliami peqataasinnaanngitsutut imminut taanngilaq, angallat aalisakkanik sunilluunniit aalisariutigineqarsinnaasimanera pillugu.

Inatsit ersarippoq

Pisortat ingerlatsineranni suliassat suliarineqartarnerat pillugu inatsimmi allassimavoq: Kinaluunniit pisortatigut ingerlatsinermi suliaqartoq suliassami aalajangersimasumi peqataasinnaanngilaq:

1) nammineq imminut eqqarsaatigaluni aningaasalluunniit eqqarsaatigalugit suliap qanoq inerneqarnissaanik soqutiginnilluinnartuuguni (...)

Kukkunersiuinermut ataatsimiititaliap tusagassiorfinnut nalunaarutimini erseqqissarpaa sulinissani aammalu ataatsimiititaliap inatsisartutigoortumik tumigavilersukkamik suliaqartutut ingerlanissani anguniaraa, tassa inuttut naalakkersuinikkullu qanoq inissisimanini peqqutaatinnagit.

Kukkunersiuinermut ataatsimiititaliaq kingullermik suliaqarpoq Naalakkersuisut benzinkortimik 2018-imi atornerluisimasinnaanerat pillugu. Allaaserisat UANI atuarsinnaavatit.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER