Kukkuneq pisussaanngitsoq: Panik marloriarlugu ilineqarpoq
Peqqinnissaqarfimmi kukkusoqarsimanera pissutigalugu Maren Abrahamsen paniminik toqungalluni inuusumik marloriarluni ilisisariaqarsimavoq.
Maren Abrahamsenimut, 31-nik ukiulimmut, illerfeeraq tunniunneqartoq siulleq imaqarsimanngilaq. Ilisinerlu naammassereertoq aatsaat illerfiup imaqannginneranik ilisimatinneqarpoq. Peqqinnissaqarfimmi sulisut paniata timaa illerfimmut ikissallugu puigorsimavaat.
- Sakkortuvoq! Ilisineq pissusissamisut ingerlasoq isumaqaraluarpunga. Ilisereernerup kingorna eqqissiallakkaluarpunga, Maren Abrahamsen Sermitsiaq.AG-mut misigisani ajorluinnartoq pillugu oqaluttuarpoq.
Maren Abrahamsen Nuummut novembari naalersoq erniartorluni aallarpoq. Decembarip pingajuani ernisussatut naatsorsorneqarsimavoq, ullorli ataaseq sioqqullugu naartuata uummataa unippoq.
Uummataa unippoq
Ernisarfimmi misissortinnermini ajorluinnartumik nalunaarfigineqarpoq.
- Ernisussiortup naartumma uummataata kassunnera tusaasinnaanngilaa, skannerneqassasungalu oqarfigaanga. Tassani paasitinneqarpunga naartunnguarma uummataa unissimasoq, Maren Abrahamsen oqaluttuarpoq.
Ullut marluk qaangiummata, decembarip sisamaani, Maren pilallugu ernitippaat – niviarsiaraq toqungasoq erniaraa.
- Misigisaq annernartorujussuuvoq. Angerlartussanngorpunga meerara toqungasunnguaq nassarlugu, Maren Abrahamsen oqaluttuarpoq.
Illerfik imaqanngitsoq
Paamiunut angerlareernermi kingorna Marenip pani decembarip 14-ani ilineqartussanngorpoq. Angerlarluni angalagami illerfinnguaq nassarpaa, isumaqarporlu panini tassani iluaniittoq. Taamaattoqanngilarli.
Ilisereernermit ullut tallimat qaangiummata Paamiut napparsimaveeraanut aggersarneqarpoq. Ataatsimiinnissamut illoqarfimmi palasi, nakorsaq meeraaqqerisorlu peqataapput. Taakku oqaluttuarput kukkuluttortoqarsimasoq. Peqqinnissaqarfimmi sulisut meeqqap timaa illerfimmut ikissallugu puigorsimavaat.
Allatut oqaatigalugu: Illerfik inuttaqanngitsoq iliveqarfimmut ilisimavaa.
- Misigissuseq nassuiaruminaappoq. Tupannarpoq. Eqqarsarpunga “sooruna taamatut aqqusaagaqartussaasimasunga”, Maren aperivoq.
Peqqinnissaqarfimmi sulisut ilisimatitsipput Marenip illerfik Marenip paniata illerfia Paamiunut tallimanngornermi decembarip 21-ani tikissasoq. Maren Abrahamsenilu aalajangerpoq ulloq taanna ilisineq pissasoq. Sapaatip akunnera qaangiussimalerpoq illerfimmik inuttaqanngitsumik ilisisoqarneraniit.
- Pisoq pillugu ulloq manna tikillugu oqaloqateqarnissannik neqeroorfigineqanngilanga. Pisoq eqqartortarpara ilaqutannut qanigisannullu tatigisannut. Nukittuniarsarinngikkaluarpunga, nukittunerartiinnavinnerali qatsuppara, Maren Abrahamsen oqaluttuarpoq.