Kukkuluttornermi inissiat PCB-qartunik pujoralatsinneqartut

Qaqortumi Blok H-mi najugaqartut arlallit inissiaminnut sapaatip akunnerani kingullermi sisamanngornermi iseqqusaajunnaaraluarput.

Ulloq taanna sioqqullugu inissiani igalaat ikeratigut pujoralaat isaasut inissiani najugaqartunut ajornartorsiutaasimasut, inissiami najugaqartoq, Sikkerninnguaq Lund Davidsen Sermitsiaq.AG-mut oqaluttuarpoq.

Ineqarnermut naalakkersuisoqarfiup uppernarsarpaa inissiani pujoralaat PCB-qartut nassaarineqarsimasut.

- Sanaartukkani PCB-qartuni suliarinninnermi iliuuserineqartussatut sanatitsisup nakkutilliisullu piumasaqaatigisai uniorlugit, suliarinnittoq qalipaammik moreersilluni piiaanermini iliuuseqarsimavoq.

- Tamassuma kinguneranik moreersinermit pujoralaat inissianut eqqussorneqarsimasut paasineqarpoq, attaveqaqatigiinnermut ineqarnermullu naalakkersuisoqarfimmi immikkoortortami pisortaq, Embla Kristjánsdóttir Sermitsiaq.AG-mut ilisimatitsivoq.

Akuutissaq PCB inissiani sanaartornermi atugassiani akuutissarineqartarsimavoq, soorlu ussissaatinut, qalipaatinut aammalu igalaanut issimik pitarneqarsinnaanngitsunut atorneqartarsimalluni. Akuutissaq arrortikkuminaatsuusoq aammalu avatangiisinut peqqissutsimullu ajoqutaasartoq, namminersorlutik oqartussat nittartakkaminni ilisimatitsipput.

Misissuineq ingerlanneqarpoq

Inissiat eqqiarluarneqareermata ineqartut angerlaqqissinnaalersimasut, ineqarnermut naalakkersuisoqarfik ilisimatitsivoq.

Suliaqartup suleriutsimi iliuusai, aamma sillimaniarnikkut peqqinnissakkullu illersorniarluni iliuusai maanna misissuiffigineqartut, attaveqaqatigiinnermut ineqarnermullu naalakkersuisoqarfimmi immikkoortortaqarfimmi pisortaq ilisimatitsivoq.

- Suliaqartup suliai, soorlu matoorinerit, milluaatit silammut supoortinneri allallu aallartinnginnerini nakkutilliisumi akuerineqaqqaassapput, suliarineranilu nakkutilliisumut nalunaarusiarineqartassallutik. Suliap suliarineqarnera immikkut nakkutigineqalerpoq, suliarinnittup malittarisassat malinnerai nakkutigalugu, Embla Kristjánsdóttir allappoq.

Blokkit aneersuartarfiisa suliarinnginneranni avatangiisit misissorneqarneranni paasineqarsimavoq qalipaatit atorneqarsimasut PCB-mik akuutissaqartut. Misissuinermi nalilerneqarpoq iluarsaassinerup nalaani ineqartut allanut inissinneqarnissaat pisariaqanngitsoq.

Inissiat suli pujoralaqartut

Sikkerninnguaq Lund Davidsen oqaluttuarpoq inissianut angerlaqqinnginnerminni inissiat eqqiarneqarsimasut.

- Angerlaratta eqqiaaqqittariaqarsimavugut, qularnaarumalluta. Sulimi takusinnaasimavarput inerput pujoralattoq, pingaartumik panitta sinittarfiani pujoralaat takusinnaasimavagut. Aamma paasitinneqarpugut iluarsaassinerup ingerlanerani igalaagut matoqqatissagigut, Sikkerninnguaq Lund Davidsen oqaluttuarpoq.

Immikkoortortami pisortaq. Embla Kristjánsdóttir qularnaarivoq inissiat PCB-qannginnersut qulakkeerniarlugu inissiat misileraatinik tigusiffigineqartartut.

Sikkerninnguaq Lund Davidsen marlunngornermi ualilluinnaraa oqaluttuaqqippoq inissiat eqqiaasunit eqqiarneqaqqissimasut.