Kukkuluttoraluarluni Kim Ujarak unamminermi ingerlalluartoq
Nunatsinni nakuunersaq, Kim Ujarak Lorentzen, nunarsuarmi nakuunerpaanngornissamut unamminermi aallartilluarpoq. Siullermeertutulli kukkuluttornermini unamminermi tullermi ajugaanissaminut periarfissani annaavaa.
World's Strongest Man, nunarsuarmi nukittunerpaanngorniuunneq Sacramentomi USA-mi ippassaq, kalaallimik peqataasoqarluni aallartippoq.
Unamminerup ulluini siullermi loading race aamma dødløft unammissutigineqarput.
Kim Ujarak Lorentzenip sungiusaasuata, Allan Juhlip nalilerpaa nunatsinni nukittunerpaaq unamminermi siullermi ingerlalluartoq. Siullermeertutulli kukkuluttornerit silaannaallu kiannerujussua pissutigalugit dødløftimi ajugaanissaminut periarfissani annaavaa.
Unammineq siulleq loading raceuvoq, unammisut tassani poorsuit 100-164 kg-mik oqimaassusillit katillugit tallimat assartussavaat. Unamminermi tullermi Kim Ujarak Lorentzenip misilittagaqarfigilluagaa dødløft unammissutigineqarpoq.
- Kim Ujarak unamminermi siullermi ingerlalluartupilussuuvoq. Misileerngaarnermili kukkuluttornerit pissutaallugit unamminermi siullermi nr. 6-inngorpoq unamminerullu aappaani nr. 3-nngorluni, Allan Juhl oqaluttuarpoq nangillunilu:
- Dødløftimi kukkuluttorsimanngikkaluaruni ajugaasimassagaluarpoq, oqarpoq.
Kiannera unammillernarpoq
Kim Ujarak Lorentzen aamma Allan Juhl naatsorsuuteqarput nunatsinni nukittunerpaaq unamminerni tullerni ingerlalluassasoq, kukkuluttoqqinnginnissarlu anguniarneqarpoq.
Unamminerilli suussusai nukittuumut unammillernarnerpaanngillat, Allan Juhl oqaluttuarpoq.
- 38 gradenik kiannera unammillernarluinnarpoq. Timaa assaalu pullalertarput, imermillu amigaateqarneq malugisarlugu. Taamaasilluni ukkassisinnaanera aamma annikinnerulersarluni. Kiannerata piareersarsimanerput periusissiorsimanerpullu kipusoortippaa, oqarpoq.
Kim Ujarak unamminerni marlunni ullumi peqataassaaq. Log repetition 145 kg aamma Wrecking Ball Hold, tassa kingullersaalluni nikorfaniunneq, peqataaffigissavai.
Unamminerit sakkortuut ullumi
- Ullumi unammiffissat nukittunerpaaffiginngilai. Sulili nukittuvoq, taamaattumillu peqataasinnaalluni. Unamminerni nr. 3-nngornissaq 4-nngornissarluunniit siunniupparput, Wrecking Ball Holdimili tamanna angujuminaassinnaavoq, Allan Juhl oqarpoq naggasiillunilu:
- Nunarput peqataatitaqarnera angisoorujussuuvoq. Kim Ujarak peqataammat nunanit allanit nunarput ilisimaneqarnerulerpoq, unammisartullu arlallit Ujarak nuannarilluarpaat nunatsinneermat, Allan Juhl naggasiivoq.
World's Strongest Man-imi angusat UANI malinnaavigisinnaavatit.