Skip to main content

Kujataata kommuniani politikkikkut ataatsimiititaliat ikilineqassasut

Kommuni Kujallermi aalajangersimavoq, eqaannerusumik innuttaasunut sullissinissaq pitsaasoq siunertaralugu polikkikkut ataatsimiititaliat ikilineqassasut.

Kommuni Kujallermi aaqqissuussaanikkut allannguinermut atatillugu politikkikkut ataatsimiititaliat ikilisinneqassapput. 

Ataatsimiititaliat arfiniliusut sisamaannanngortinneqassaat siunniunneqarsimavoq, kommuni tusagassiorfinnut nalunaaruteqarluni allappoq.

- Eqaannerusumik innuttaasunut sullissinissaq pitsaasoq siunertaralugu ataatsimiititaliat arfiniliu-sut sisamaannanngortinneqarnissaat siunniupparput, innuttaasut sullissinermik pitsaasumik misigitilissagutsigit ullumikkut ingerlatseriaaserput allanngortittariaqarmat, borgmesteri Stine Egede  (IA) tusagassiorfinnut nalunaaruteqarnermi oqarpoq.

Soraarsitsisoqassanngitsoq

Ataatsimiititaliat arfiniliusut sisamaannanngortinniarneranni Meeqqeriveqarnermut Atuarfeqarnermut Ingerlatsivik, Kulturi aamma Majoriaq ataatsimiititaliatut ataatsimoortinneqalissapput; Isumaginninneq pitsaaliuinerlu ataatsimoortinneqalissapput, Teknikkimut Ingerlatsivik ullumikkutut ingerlaannassaaq. Aningaasaqarnermut ataatsimiititaliaq Innuussutissarsiornermullu suliffeqarnermullu ataatsimiititaliaq ataatsimuulissapput.

- Ataatsimiititaliat ikilineqartussanngornerat sulisunik ikililerinermik nassataqarnavianngilaq, pitsaanerusumimmi sullisserusunnitsinni sulisut tamaasa atorfissaqartippagut, Stine Egede nassuiaavoq.

Aaqqissuusaanikkut allanngortitsiniarnermi suliffeqarfik Innovation South Greenland Kommune Kujallermit pilersinneqarsimasoq inerisarniarlugu Inuussutissarsiornermut ineriartornissamut ingerlatsinerit amerlanerusut ISG-mi inissisimalernissaat eqqarsaataavoq. 

Aappaagu atuutilissasoq

- Ataatsimiititaliat ikilinerisigut aaliangiisinnaasullu sumiiffinni siammarnerisigut sullissinerlu sukkanerusumik pitsaanerusumillu ingerlanissaanut ingerlariaaseqarnissatsinnut pilersaarusiussuarput, tamannalu anguniarlugu suliaq annertooq suliaralugu aallartereerpugut, Stine Egede ilisimatitsivoq.

Aaqqissuussinikkut allannguineq upernaaru naammassineqarsinnaasoq naatsorsuutigineqarpoq.

- Naatsorsuutigivarput 1. juni aaqqissuussaanikkut allannguilluni inissititserinissap piareersimanissaa. Piffissami aggersumi pisortat sulisut sinniisuisa ataatsimiititaliaat il.il. ataatsimeeqatigisassavagut naatsorsuutigaarpullu februarimi kommunalbestyrelsip siullermeerluni oqaluuserissagaa, Kommune Kujallermi pisortaaneq Tine Pars pilersaarutit pillugit nassuiaavoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER