Kujataanit Qasigiannguanut suliartortut

Qaammammi kingullermi Royal Greenland Qasigiannguit qullersaat suliffissuarmilu sulisut aaqqiagiinngissuteqarput.

Suliffissuaq sulisussaaleqivoq, avannaani illoqarfimmi tassani suliffissarsiortut amerlagaluaqisut.

Maannalu kujataanit inuit tallimat illoqarfimmut tassunngarput suliffissuarmi suliartorlutik.

Oqaloqatigiinnerit

– Sapaatit akunnialunnguisa matuma siornatigut Kommune Kujallermi suliffissarsiuussisarfik nammineerluni Royal Greenlandimut saaffiginnippoq sulisussanillu neqerooruteqarluni, tamannalu qujaruteqarput. Tamatuma kingorna Qaasuitsup Kommunia oqaloqatigisarparput, maannalu taakkua atorfinitsissinnaalerpavut tamarmik naammagisimaarutigisaannik, suliffeqarfissuarmi sulisunik ineriartortitsinermut pisortaq Søren Olen Damgaard oqarpoq.

Sulisunik nutaanik tallimanik atorfinitsitsineq kisiartaasimanngilaq. Sinerissami suliffissarsiuussisarfiit suleqatigalugit sulisut nutaat 20-t missaanniittut atorfinitsinneqareersimapput, taakkunannga sisamat Qeqertarsuarmit, sisamat Sisimiunit, pingasut Nuummit ataaserlu Maniitsumit.

Neriulerneq nukissaqalernerlu

– Aamma illoqarfimmi maani allagartaliisimavugut, taamaasillutalu suliffissarsiuussisarfiit avaqqullugit sulisunik nutaanik tallimanik pissarsisimalluta, taamaattumik isumaqarpunga suleqatigiillluartunik pissarsisugut, suliffissuarmilu sulinerup nanginneqarnissaanut nutaamik neriuutissaqalerlutalu nukissaqalerpugut. Kujataanillu suleqatissatta nutaat tikilluaqqunissaat qilanaaraarput, Qasigiannguani suliffissuup pisortaa Frank Hagen oqarpoq.

Sulisunik nutaanik kingullernik atorfinitsitsinikkut Qasigiannguani suliffissuaq sulisussaaleqinngikkallartussanngorpoq.

– Pisassiissutit allallu, suliffissuarmi tunisassiornermik unitsitsisinnaasut, apeqqutaatillugit naatsorsuutigaarput sulisut nutaat ukioq kaajallallugu Qasigiannguani suliffeqarnissaat qulakkeersinnaallutigu, oqaatigisariaqarporlu Qasigiannguani sulisut ukiuni kingullerni angerlartinneqartarsimanngimmata, Søren Olsen Damgaard oqarpoq.