Kujataani timmisartoqarfissaq allannguuteqartinnagu suliariumannittussarsiuuteqqinneqarpoq
Kalaallit Airports Qaqortumi timmisartoqarfissap mittarfissaanik naammaginartumik akilimmik sanasussarsioqqippoq.
Sisamanngornermi januaarip arfineq-aappaanni Qaqortumi timmisartoqarfissaq suliariumanittussarsiuuteqqinneqarpoq, paasinarsivorlu suliariumannittussarsiuussinermi siullermi Namminersorlutik Oqartussat akuerisinnaanngisaannik missingersuutit sinnerlugit neqeroortoqarsimanera pissutigalugu suliariumannittussarsiuussineq taamaatiinnarneqarsimagaluartoq neqeroorutigineqartoq allanngortinneqarsimanngitsoq.
Martsip aqqaneq-aappaata tungaanut suliariumannittussarsiuussineq ingerlanneqassaaq, aamma mittarfinnik ingerlatseqatigiiffiup ingerlatseqatigiiffiit suliariumannittussarsiuussinermi siullermi neqerooruteqarsimasut attaveqarfigisimavai.
- Suliassaq taannarpiaq suliariumannittussarsiuuteqqinneqarpoq, allaanerussutigilaarpaali sanaut maanna timmisartoqarfiup illutassaata sananeqarnissaanut aamma neqerooruteqarsinnaanerat, Kalallit Airportsimi pisortaq Jense Lauridsen Sermitsiaq.AG-mut ilisimatitsivoq.
Suliassaq anginerusoq
Timmisartoqarfiliorniarneq decembarip 16-ianili suliariumannittussarsiuunneqalersimavoq, neqeroortueqarniartullu kingusinnerspaamik martsip aallaqqaataani neqeroorumminnik tunniussereersimassallutik.
Suliassat marluunerisigut - tassa mittarfiliorlunilu illutassanik sanaartornissaq - sansut suliassanut marluusunut neqeroorsinnaanerannik periarfissiisoqarpoq. Taamaalilluni suliassaq annerulerpoq, neriuutaavorlu akigititassatut neqeroorutigineqartut Kalaallit Airports Domesticimit Namminersorlutillu Oqartussanit akuerineqarsinnaassasut, ingerlatseqatigiiffimmit nassuiaatigineqarpoq.