Kujataani timmiartoqarfissap tungaanut aqquserniornissamut aningaasaliissutissat itigartinneqartut
Aningaasaqarnermut Ataatsimiititaliap Naalakkersuisut 5,7 millioner koruuninik aningaasaliissuteqarnissamut qinnuteqaataat akuersaarusunngilaa. Kommuni Kujalleq Qaqortumi timmisartoqarfissap tungaanut aqqusinissap inaarsarlugu suliarinissaanut akissaqartussaavoq
Aningaasaqarnermut Ataatsimiititaliaq isumaqarpoq, Qaqortumi timmisartoqarfissap nutaap tungaanut aqquserniornermi aningaasartuutit kommunip karsianit akilerneqartariaqartut.
Naalakkersuisut kommunimut aningaasaliissuteqarnissamik qinnuteqaamminnut ilanngussimavaat, ”suliffissaaleqinermik akiuiniarnermut” tamatuma ilanngunneqarnissaanik kissaateqarsimaneq, tunngavilersuulli tamanna aningaasaqarnermut ataatsimiititaliamit aamma itigartinneqarpoq.
Isumaqatiginninniarnerit suli naammassineqanngitsut
Aningaasaqarnermut Ataatsimiititaliamit erseqqissaatigineqarpoq, aqquserniornissaq kommunip illoqarfimmi pilersaarutaanut ilaasoq, aamma nunami sanaartornissamut tunngatillugu kommunit Namminersorlutillu Oqartussat isumaqatigiissutissaannik isumaqatiginninniarneq suli naammassineqanngitsoq.
- Ataatsimiititaliaq taamaammat isumaqarpoq, Kujataani aqquserniornissamut immikkut aningaasaliissutissanik immikkoortitsinissamut aamma sanaartugassamik Kommuni Kujallermut tunniussinissamik piginnaatitsinissaq siusippallaartoq, aningaasaqarnermut ataatsimiititaliap juulip 21-ani ataatsimiissimaneranit imaqarniliami tamanna allassimavoq.
Neqeroorut pillugu oqaasertaliussat marluk aningaasanillu Kommuni Kujallermut tunniussiniarneq ataatsimiititaliamit aamma iluarineqarpallaanngilaq.
Tamakkerlugu ataatsimut takujuminaatsoq
- Ataatsimiititaliamit Naalakkersuisut inassuteqaataat tamakkerlugit ataatsimut takujuminaatsinneqarput. Ataatsimiititaliaq isumaqarpoq, suliaq kommuninit allanit taamatut assingusumik pisoqartillugu atorniarneqarsinnaassasoq, aningaasaqarnermut ataatsimiititaliap Naalakkersuisunut akissutaani allassimavoq.
Ataatsimiititliamit takujuminaatsinneqarpoq, aqqusinermut aningaasaliissuteqarnerup Covid-19-ip malitsigisaanik suliffissaqartitsinissamik pisariaqartitsilernermut tamatuma toqqaannartumik attuumassuteqarsinnaanera.
- Ataatsimiititaliaq isumaqarpoq aqqusineq pingaaruteqartoq, kommuninulli isumaqatigiissutit malillugit, kommunip tamanna suliassaringaa ataatsimiititaliaq isumaqarpoq. Ataatsimiititaliap isumaa malillugu, Kommuni Kujallermi tamarmi, illoqarfiit annersaannaaniinngitsoq Qaqortumi, suliffissaqartitsiniarluni suliniuteqarneq ingerlanneqartariaqartoq.
Naligiinnerusumik agguaassisoqarnissaanik ujartuisut
- Aningaasanik kommunimi naligiinnerusumik agguaassisoqartarnissaanut peqatigitillugu suliffiit sumi iluaqutaanerusinnaaneri misissorneqartariaqarput, imaqarniliami allassimavoq, tassani aamma allassimavoq ataatsimiititaliamit maluginiarneqarsimasoq, sanaartugassat illoqarfiit annersaanni Qaqortumi ingerlanneqarnerusartut.
- Pitsaanerpaassaaq suliniutigineqartut suliffissaaleqiffiunerpaasuni aamma suliffissatigut periarfissaqannginnerusuni aallartinneqartartuuppata, aningaasaqarnermut ataatsimiititaliami politikkerit, Simumeersumik Hermann Berthelsenimik siulittaasullit taamatut isumaqarput.