takornariaqarneq
Kujataani takornariaqarnermut peqatigiiffik nutaaq pilersinneqarpoq
Pingasunngormat ualikkut Turistforening Sydgrønland aallarnerlugu ataatsimeersuartoqarpoq, siulersuisunik qinersisoqarluni, ilaasortaanermut akiliut aalajangerneqarluni aammalu peqatigiiffiup nutaap pingaarnerpaatut suliassai tulleriiaarneqarlutik
Edda Lyberthip inuussutissarsiutillu ineriartortinneqarnerannut pisortap Kenneth Høeghip takornariaqarnermut peqatigiiffik aammalu Destionation South Greenland nutaaq, DSG, piareersarsimavaat.
Pingasunngormat aallartitsiniarluni ataatsimiinnermi isumaqatigiissutigineqarpoq takornariaqarnermut peqatigiifimmik aallartitsisoqassasoq, DSG-lu nutaaq kingusinnerusukkut pilersinneqarumaartoq.
Takornariaqarnermut peqatigiiffimmi siulersuisunut ilaasortanngorput Pitsi Høegh, Greenland Sagalands, Kattie Nielsen, Hotel Narsaq, Rina Høegh Lund, Hotel Narsarsuaq, Ole Guldager, Narsarsuup katersugaasivia kiisalu savaatilik Lars Nielsen. Sinniisussatut toqqarneqarput Makkak Nielsen aamma Najâraq Skifte Møller.
Nanortalimmit siulersuisunut ilaasortamik toqqaasoqartussaagaluarpoq, Nanortalilli qujaannarpoq ulapittoqarnera pissutigalugu, taavalu Ole Guldager Narsarsuarmeersoq toqqarneqarpoq.
2015-ip sinneranut ilaasortaanermut akililut 500 koruuninut aalajangiunneqarpoq.
Visit Greenland siulersuisuni inissamik neqeroorfigineqarpoq namminerli kissaatigaa alapernaatsuinnartut peqataanissani, tassa taaseqataasinnaanani.
Ataatsimeersuartut ukioq manna suliassat pingaarnersaattut akuersissutigaat peqatigiiffiup sumunngartarfimmullu selskabip aningaasaqarnerat siunissamut qulakkeerneqassasoq, ilaatigut kommunimik kiffartuussinissamik isumaqatigiissuteqarnikkut, takornariaqarnermik ingerlatsisuni aningaasassarsiornikkut kiisalu aningaasaateqarfinnut qinnuteqarnikkut. 2015-ip sinneranut atugassat 590.000 koruuniinnanngorsimapput.
Suliassat allat:
UNESCO-p Kujataani nunarsuarmi kingornussassatut suliniutaa brand-issallugu tapersersussallugulu. Kujataa ussassaarutigissallugu angalaffissallu pillugit ataatsimeersuarnerni peqataasarnissaq, nunap immikkoortuata ilisimaneqarnera siammarsarniarlugu.
Kujataani attaveqaatit pitsanngorsarnissaat.
Webportal-imik pilersitsinissaq nutaarsiassanillu saqqummersitsisarnissaq.
2016-ip naanerata tungaanut iliuuseqarnissamut pilersaarusiornissaq, kiisalu aallartisarnerup ingerlatsinerullu qulakkeerneqarnissaat.
Illutoqqat oqaluttuassartallit aserfallatsaalineqarnissaat, pisuttuarfinnik nutaanik nalunaaqutsersuineq, tunisassianik ineriartortitsineq sammisaqarfimmi attuumassutilinnik ilinniagaqartitsilluni pikkorissartitsisarnissat, kiisalu allagartalersuineq nunallu assingi nutaat, kingullertullu minnerunngitsumilli ilisarnaatissamik sananissaq, inuit takornariaqarnermut peqatigiiffimmut nutaamut attuumassuteqartitaannik.
Nanortalimmut Qaqortumullu toqqaannartumik video-kut attaveqarneq nalunaaqutaq 16 unitsinneqarpoq, tamatumalu kingorna ataatsimiinneq naavoq.