Kujataani sinersortaammut ilaasunut ingerlaqqissinnaajunnaartunut ikiuisoqalersoq
Ilaasut katillugit 121-t Sarfaq Ittummut ilaasussaasimagaluartut, maannakkullu umiarsuarmi sulisut akornanni coronap tuniluutilernera pissutigalugu Kujataaniit ilaanngitsoortut, maanna ingerlaqqinnissaminnut ikiorneqalerput.
Sinersortaat Sarfaq Ittuk inuttat akoranni coronamik tunillatsittoqarsimasinnaanera pissutigalugu sapaatip-akunnerani kingullermi ilaasussanik ikeqqusiunnaarpoq.
Tamatuma malitsigisaanik ilaasut 121-t Kujataaniit ingerlariaqqissinnaajunnaarsimapput. Maannalu ilaasunut ingerlariaqqissinnaajunnaarsimasunut nutaarsiassatsiaqalerpoq.
Salliutitsisoqassasoq
Arctic Umiaq Line tusagassiorfinnut nalunaaruteqarluni allappoq, umiarsuaatileqatigiiffik ilaasunut ingerlaqqissinnaajunnaartunut allakkut timmisartukkut umiarsuakkulluunniit ingerlaqqissinnaanissaannut ikiuutissasoq.
- Ilaasut namminneq angerlarsimaffimminnut apuunniarlutik angalasut salliutinneqassapput, umiarsuaatileqatigiiffimmit oqaatigineqarpoq.
Ilaasut toqqaannartumik Arctic Umiaq Linemut billetisisimasut attavigineqassapput.
- Naalakkersuisut corona pissutigalugu immikkut ittoqartillugu konto atorneqartartoq atulissallugu pingaartissimavaat, tamanna isumaqarpoq ilaasut ingerlaqqissinnaajunnaartut maanna apuuffissaminnut apuunnissaannut ikiorneqassasut, umiarsuaatileqatigiiffik ilisimatitsivoq.
Misissortissimanermi akissutissat utaqqineqartut
Umiarsuarmi sulisut nappaammik eqqorneqarsimasut maanna niusimalerput sulisullu sinneri sapaatiummat misissortinneqarput.
- Misissukkat taakku inerneri suli utaqqineqarput, Arctic Umiaq Linemit oqaatigineqarpoq.