Kujataani sinerissap qanittuani saarullik tupaallatsitsivoq
Ukiut kingulliit arlallit sinerissap qanittuani aalisarnermi saarulliisannera aalisartunut ilungersunartorsiortitsisimasoq, maannali pitsaanngoriaateqartoq siunissamut isumallualersitsivoq
Ukiut marlussuit matuma siornatigut Kujataani sinerissap qanittuani aalisarnerup piffissami qanittumi pitsanngoriaateqarfiunissaanut isumalluarnartoqanngilaq. Aammali ukiut ingerlaneranni pisaasartut nalunaarsorneqartarnerannut paasissutissat takutippaat, Kujataani sinerissap qanittuani aalisarnermi pisat, sinerissap sinneranut naleqqiullugit appasinnerujussuusut.
Aalisarnermilli inuussutissarsiuteqarneq tupaallannartumik pitsanngoriaateqarpoq, tamannalu Kujataani aalisartunut siusinnerusukkut ilungersunartorsiortareersunut siunissamut isumalluarnerulersitsivoq. Maannakkumut saarulliit pisaasartut amerlaneruliinnaratik, aammali anginerulersimapput.
Siunissaq qaamanerusoq
Narsap eqqaani qaleralinniarneq siornamut naleqqiullugu pitsaannginneruvoq. Akerlianilli saarulleqassuseq siornatigut ajorluinnarsimagauartoq, maannakkut malunnaatilimmik pitsanngoriarsimavoq. Aammali ukioq manna nipisanniarneq siornatigumut naleqqiullugu pitsaaneruvortaaq. Qassitinut nipisanniutinut saarullit napittartut amerlapput, taakkulu aamma tunineqartarput. Taama oqarpoq Narsami aalisartut piniartullu peqatigiiffianni siulittaasoq, Ole Jørgen Davidsen. Narsami aalisakkut suliffissuit marluusut, Arctic Prime Fisheries Aps-imit Royal Greenland A/S-imiillu pigineqarput. Aalisakkeriviillu aalisarnerup ineriartorneranut malinnaasariaqartut, tunitsiveqarnikkullu ajornartorsiortoqalernissaa pinngitsoortinniarlugu aaqqitaasinnaasunik piareersimasuuteqartariaqartut, taanna isumaqarpoq.
Allaaserisaq tamaat Sermitsiami atuaruk – uani ataani aviisimut isissutissarsigit: