Kujataani savaateqarneq ukkatarineqartoq
Kommuni Kujallermi sapaatip akunnerani matumani 'Sava' qulequtaralugu aaqqissuussisoqarpoq, tassani innuttaasut periarfissinneqarput, savaateqarnermik inuussutissarsiuteqarnermik ilisimasaqarnerulernissamut.
Savaateqarnermik inuussutissarsiuteqarnermut ilisimasat annertunerulissapput.
Kommuni Kujalleq taamaammat Narsami 'Sava' qulequtsiullugu aaqqissuussisimavoq, tassani innuttaasut soqutiginnittut Kujataani savaateqarnerup oqaluttuassartaanik tamatumalu pingaaruteqassusaanik paasisaqarsinnaapput.
Kommuni Kujallermi pinaveersaartitsinermut siunnersorti Bolethe Stenskov ilisimatitsivoq, aaqqissuussinermi siunertarineqartoq innuttaasut savaateqarluni inuuneqarnermik aamma savaateqarnerup oqaluttuassartaanik tamatumalu Kujataani pingaaruteqarneranik ilisimasaqarnerulernissaat.
- 'Sava' pillugu aappassaanik aaqqissuussivugut, aaqqissuussarlu Narsami savaaqqanik toqoraanerup aallartinnerani pisussatut aalajangersimavarput, taanna oqarpoq.
Savaatillip nulia soraarneq Martha Egede Igalikup kangerluaniittumi Illorsuarni savaatilittut inuunini pillugu pingasunngormat oqalugiarpoq, tamannalu pereermat inuit takkussimasut 35-it missaanniittut apeqquteqartarsimapput.
Silami grillerineq
Martha Egede 74-inik ukioqarpoq, Igalikullu kangerluaniittumi Illorsuarni ukiuni 55-ini najugaqarsimalluni, tassa 1963-imiit 2018-imut.
Toqoraavik Neqi A/S sisamanngormat katersortarfimmi tunisassiaminik saqqummiussivoq, taakkunanngalu ussiititsilluni, tallimanngormallu unnukkut innuttaasut illuanni savaaqqap savallu neqaannik nerisassianik nutaanik ussiititsilluni.
