attaveqaatit

Kujataani radiokæde qamittoorataannaavoq

Oqarasuaatinik, mobilimik, internettimik kiisalu tv-p radiollu tigooraasinnaanerat kujataani qamittoorataannaavoq

Kujataani silarlunnera pissutigalugu Tele-Postimi sulisut nassitsisarfimmut teknikkikkut akornuteqalersumut ornigussinnaasimanngillat. Taanna qamittuussappat Nunatta kujaterpiaani radiokæde unittoorsinnaavoq

Tele-Postimi sulisut maanna ilungersorlutik kujataani radiokædep unittoorsinnaanera pinngitsoortinniarsaraat. Nunaqarfiit Tasiusaq, Narsarmiit, Aappilattoq aamma Ikerasassuaq qamittoortoqassappat eqqorneqarsinnaapput. Silap ajornera pissutigalugu nassitsissut ajoqutilik orninneqarsinnaanngikkallarpoq.

- Tretopfjeld-imi sakkortusaavimmi motoorit illutaanni kiassarnikkut ajornartorsiuteqarpugut, taamaammat motoorit tamakkiisumik ingerlasinnaanngillat. Sumiiffimmi tamaani anorlerpallaarnera pissutigalugu timmisartumik tassunngarsinnaanngilagut, periarfissarsiniariarunilli sulisugut tassunngassapput ajoqutaasumillu aaqqissuussillutik, attaveqaatinut nassitsinermullu pisortaq Kaj Skytte oqarpoq.

Sakkortusaaviup attaveerunnerata kingunerissavaa telefoninik tamanik, mobiltelefoninik aammalu internetimik atuisinnaajunnaarneq, aammalu KNR TV-p radiollu Nanortalimmi nunaqarfinnilu Tasiusami, Narsarmiini, Aappilattumi aamma Ikerasassuarmi attaveerunnera. Timmisartut sumiissusersiornerat, sinerissami radio kiisalu timmisartunut sumiiffimmi tamaani attaveqarneq aamma sunnerneqassaaq. Allatut iliorluni attaveqaqatigiissinnaaneq periarfissaqanngilaq.

Attaveeruttoqassagaluarpat nunaqarfinni Nanortalimmilu innuttaasut telefoninut nalinginnaasunut sumiiffimminni sianersinnaajuassapput. Narsarmiini Aappilattumilu innuttaasut Nanortalimmut sianersinnaassanngillat.

Powered by Labrador CMS