Kattie Egede Motzfeldt Kommune Kujallermi atuarfinnut, paaqqinnittarfinnut, kulturimut, sunngiffimmut suliffeqarnermullu ingerlatsivimmi pisortatut nutaaq atorfinittussanngorpoq.

Kommuni nittartakkamini taama paasissutissiivoq.

- Arnaq misilittagartooq ineriartortitseqataaniarluni Kujataanut uterpoq, tamannalu suliassaqarfimmit atorfissaqartinneqarpoq, kommunaldirektør Tine Pars oqarpoq.

Oqaaseqaat tamanna Kattie Egede Motzfeldtip suliatigut tunuliaqutaanit taperserneqarpoq.

Piginnaasat pisariaqartut

Ingerlatsivimmi pisortanngortussaq perorsaanermi nalinginnaasumi masteritut atuarfimmilu aqutsinermi pædagogisk diplomuddannelsenimik ilinniagaaqarsimavoq. Kattie Egede Motzfeldt ilinniartitsisutut, atuarfiup pisortaatut sunngiffimmilu sammisassaqartitsinermi pisortatut sulisimavoq.

Kommuni paasissutissiivoq, meeqqat atuarfianni perorsaanermi aalajaalluni allanngueqataasimasoq. Kattie Egede Motzfeldt tamatuma saniatigut meeqqanut kulturimullu ingerlatsinermut tunngasuni assiigiinngitsunik suliaqartarsimavoq, ukiorpaalunngulersunilu siunertaqarluartumik sulianik aqutsinermilu soqutigisaqartuulluni.

- Kattie ingerlatsivimmi pisortartut atorfeqarnermini kommunip suliatigut politikkikkullu anguniagaanut piginnaasani atorlugit kivitseqataajumaarpoq, kommunaldirektøri oqarpoq:

- Kattiep suleqatiginissaa qilanaareqaara.

Kattie Egede Motzfeldt, Jesper Ryttov kingoraarlugu atorfinittoq, juulip aallaqqaataani sulilissaaq.