Kujataani pinngortitaq aatsitassarsiornerlu nalunaarusiami imartuumi nassuiarneqartut
Kujataani aatsitassarsiorneq avatangiisinillu eriaginninneq pillugu siunissami aporaaffiusinnaasut kiisalu eriagisassanik kingornutassat pillugit ilisimatuut nalunaarusiamik annertuumik suliaqarput.
Kujataani aatsitassarsiornissamik suliniutit ukiuni kingullerni oqallisaangaatsiartarput - soorlu Kuannersuarni aatsitassanik qaqutigoortunik, uranitaqartunik, piiaanissamut pilersaarutaasimasut aaqqiagiinngissutaasartut.
Aatsitassarsiornissamut pilersaarutit suliniutillu pillugit ernumagineqartarpoq pinngortitamut avatangiisinullu taakku sunniutissai.
Nalunaarusiami nutaami ilisimariikkat katersorneqarput, kujataanilu pinngortitaq avatangiisillu pillugit ilisimasaat nutaat aamma nassuiarneqarlutik.
Nalunaarusiap siunertaa tassaavoq oqartussat aatsitassarsiornermik suliniutinik pitsaanerpaamik aqutsisinnaanissaat minnerpaamik avatangiisinut pinngortitamullu sunniisussaamik.
Nalunaarusimi sumiiffik suna pineqartoq, nunap assigani ataaniittumi takusinnaavat:
Ilisimatusartut kujataani sumiiffimmi ujarassiorneq, uumassuseqatigiit aamma avatangiisini akuutissat pillugit paasissutissat katersorsimavaat taamatullu nunap immikkoortuata innuttaasunit atorneqarnera kingornussassallu qulaajarsimallugit.
Sumiiffimmi uumasut pillugit nalunaarusiami nassuiaammi atuarneqarsinnaavoq nunatsinni nattorallit amerlangaatsiartut kujataani najugaqartuusut, taamatullu appat aamma najugaqarfigigaat.
Aatsitassarsiorfinninngaanniit mingutsitsisinnaanerit
Nalunaarusiaq aatsitassarsiornerup avatangiisinut sunniutai pillugit immikkoortumik aamma imaqarpoq. Avatangiisinut sunniutit pinngitsuuinneqarsinnaanngillat, annikinnerpaamiitinniarlugilli iliuuseqartoqarsinnaavoq.
Nunap iluani imaluunniit nunap qaavani aatsitassarsiornerit apeqqutaallutik avatangiisinut sunniutit assigiinngitsuusarput.
- Aatsitassarsiornermik pilersitsisoqassappat avatangiisit pillugit unammillernarnerpaaq tassaassaaq, akuutissat arrortikkuminaatsut tailingsillu eqqaaveqarfissaannik pilersitsinissaq, avatangiisinut siaruaatinnginnissaat anguniarlugu, nalunaarusiami nassuiarneqarpoq.
Silap pissusaata allanngoriartornerata nunap immikkoortua allanngortingaatsiarsinnaagaa
Silap pissusiata allanngoriartornera siunissami periarfissanut aamma sunniuteqassaaq. Silap pissusiata allanngoriartornerata kujataani qanoq sunniuteqassanersoq pillugu nalunaarusiaq aamma nassuiaateqarpoq.
Aasaanerani naasut naajartortarfiat, ukiut untritilikkaat matuma naalernerani ullunik 60-inik sivisunerussasoq erseqqissarneqarpoq.
Nalunaarusiaq Naalakkersuisunit maanna tusarniutigineqarpoq. Kujataani siunissami suliniutit pineqartillugit nalunaarusiami paasisat inerniliussallu sapinngisamik peqataatinneqartarumaartut, Aatsitassarsiornerup iluani Avatangiisinut aqutsisoqarfiup ilisimatitsissutigaa.