Kujataani nutaanik tunillatsittoqarsimasoq

Kommune Kujallermi coronavirusimik tunillatsissimasunik nutaanik paasisaqartoqarsimavoq. Kisitsisit nutaat corona.nun.gl-imi saqqummiunneqartuni tamanna nalunaarutigineqarpoq. Oqartussanit oqaaseqartitsinissaq iluatsissimanngilaq.

Nunatsinni oqartussat coronavirus pillugu kisitsisaatiminnik nutarterisimapput. Kisitsisit takutippaat nunatsinni maanna 18-inik tunillatsissimasoqartoq. Taakkunannga qulit Kommune Kujallermiillutik.

Taamaammat Kommune Kujallermi Covid-19-imik tuniluuttoqarsinnaarpasippoq. Sapaatip akunnerata ataatsip ingerlanerani arfinillit siulliit paasineqarsimapput.

Tunillatsissimasut sisamat julip 15-ani misissuisoqarnerani paasineqarput.

Pingasut tunillatsereersimasumut qanittumiissimapput, taamaammallu mattusimagallareerlutik.

Tunillatsissimasup kingulliup qanillivallaarsimasinnaasai pillugit suli misissuisoqarpoq. Sumiissimasinnaanera kikkunnullu qanillivallaarsimasinnaanera suli qulaajarneqarpoq. Paasiniaaneq politiinit nakorsaaneqarfimmiillu suleqatigiissutigineqarpoq.

Kommune Kujallermi tunillatsissimasut arfinillit sapaatip akunnerata ingerlanerani paasineqaqqaarput. Sisamallu paasineqarmata suli tuniluuttoqartoq paasinarsivoq.

Oqartussat kisitsisisaatiminnik ullormut ataasiarlutik nutarterisarput, taamaammat tunillatsissimasut nalunaarutigineqartut nikingassuteqarsinnaasarput, nittartakkami kisitsisit nutarterneqarneri apeqqutaallutik.

Tunillatsissimasoq ataaseq Qaqortumi Rockhousemi Tomba tallimanngornermi 9. juli tusarnaartitsinerani peqataasimammat tunillatsissimasinnaasunik arlalinnik misissuisoqarpoq. Tusarnaariaqataasut 250-it mattusimagallaqquneqarsimapput taamatullu misissortissallutik.

Misissuisarfik ammarneqarpoq

Kommune Kujalleq nakorsaaneqarfillu suleqatigiillutik illoqarfiup atuarfiata, Tasersuup Atuarfia, eqaarsaartarfiani misissuisarfimmik pilersitsipput.

Misissuisarfik ullumi tallimanngorneq 16. juli nalunaaqutaq 10.00-17.00 ammassaaq, aqagulu arfininngornermi 17. juli nalunaaqutaq 9.00-16.00 ammassalluni.

Coronavirus Delta nunatsinni tuniluuttuunersoq suli paasineqanngilaq.

Kommune Kujallermi nutaanik tunillatsittoqarsimanera pillugu Sermitsiaq.AG oqaaseqartitsiniaavoq.

Powered by Labrador CMS