Kujataani nunaqarfinnut pajuttuinerit kinguaattoorfiusut
RAL-ip umiarsuaataa motooriminik ajornartorsiuteqarpoq, taamaammallu Kujataani nunaqarfinnut pajuttuinerit kinguaattoorfiullutik.
Royal Arctic Linemit ilisimatitsissutigineqarpoq, Angaju Ittuup motooriminik ajornartorsiuteqarnerata sivitsortup kingunerisaanik Kujataani nunaqarfinnut pajuttuinerit kinguaattoorfiusut.
- Kujataani pajuttuinermi oqilisaassisussatut Adolf Jensen attartorneqarpoq. Umiarsuup usisinnaassusia nassiussat annertussusiannut naammanngilaq, soorlu aamma umiarsuaq qerisunut inissaqartitsinngitsoq, taamaammat nunaqarfiit ilaannut nassiussanik suli assartugassaqarpoq, Royal Arctic Line tusagassiorfinnut nalunaaruteqarnermi allappoq.
Umiarsuaatileqatigiiffik Namminersorlutik Oqartussanit pigineqartoq naapertorlugu, Ivalo Arctica sapaatit akunnerata naanerata ingerlanerani kujammut aallassaaq, nassiussanik useqassaaq peqatigisaanillu sumiiffimmi nunaqarfinnut nassiussat apuussornissaannut suliniuteqarnermi annertusaaqataassalluni.
Angaju Ittuk
Angaju Ittuk 80-ikkut aallartinneraneersuuvoq.
Umiarsuit ilaatigut Angaju Ittummik taarsiisussat Spaniami maannakkorpiaq sananeqaleruttorput umiarsuillu 2021-mi ukiakkut tunninneqarnissaat naatsorsuutigineqarpoq.
Pissarsiffik: Royal Arctic Line
Arsuk immikkut eqqugaaqqasoq
- Nunaqarfiit amerlanersaannut nassiussanik assartugassaqarpoq, pingaartumilli Arsuk eqqugaaqqavoq, Royal Arctic Line taamatut inissisimasoqarneranik ajuusaaruteqartoq ilisimatitsivoq.
Royal Arctic Linemit nassiussat pingaarnersiorneqarnissaat sapinngisamillu sukkanerpaamik apuunneqarnissaat qulakkeerniarlugu KNI suleqatigineqarpoq.
Umiarsuaatileqatigiiffimmi Angaju Ittummut kingoraartissat suli utaqqineqarput, naatsorsuutigineqarporlu sapaatit akunnerata tulliata ingerlanerani umiarsuaq angalaqqilissasoq.
Royal Arctic Line aamma sapaatip akunnerani matumani siusinnerusukkut Tunumi ajornartorsiuteqarpoq, tassani umiarsuaatileqatigiiffiup umiarsuaa pilersuisoq Ittoqqortoormiit eqqaanni sikorsuit pissutigalugit ingerlaqqinnaveersimagami.