Kujataani nuna piffissap sivikitsup ingerlanerani pingasoriarluni sajussimasoq
Nuna sisamanngormat sajoqqissimavoq.
Kujataani nuna sajoqqissimavoq. Tamanna pivoq sisamanngornerup unnuaani, qaammatillu ataatsip ingerlanerani pingajussaanik sajussimalluni .
De Nationale Geologiske Undersøgelser for Danmark og Grønland (GEUS), nunap sajunneranik uuttuisartoq taamatut ilisimatitsivoq.
Kujataani nunap sajussimaneri pingasut taakku richterip uuttuutaa malillugut 4.5-ip missaanik sakkortussuseqarsimapput, taakkulu januaarip 15-iani, 19-iani 27-anilu uuttortarneqarsimallutik.
Siusinnerusukkut pisarsimasoq
- Sumiiffimmi taamatut sakkortutigisumik sajuffiusartumi tulleriiginnangajammik pingasoriarluni sajussimavoq, GEUS nittartakkamigut allappoq.
GEUS naapertorlugu, siusinnerusukkut tulleriiginnarnik pingasoriarluni tallimariarluniluunniit sajuttoqartarsimavoq. Tamanna assersuutigalugu pisimavoq, 2012-13-ip ukiuunerani 2005-imilu decembarip qaammataani
- Sapaatip-akunnerini kingullerni takusimasatsitut, taamatut sakkortutigisumik sajuttoqaqqissinnaavoq. Kujataani sakkortunerpaamik sajuttoqarsimaneranik nalunngisarput, 1998-imi pisimavoq, taamanikkullu 5.0-imik sakkortussuseqarsimalluni, GEUS allappoq, innuttaasunullu sajuttoqarneranik malugisaqarsimasunut kaammattuutigalugu, GEUS-ip nittartagaatigut oqaluttuarissagaat.