Kujataani kuultisiorneq: Suliffiit nutaat 100-t pilersinneqassapput

AEX Gold Islandimiumik aqunneqartoq aappaagu kujataani kuultisiorfitoqqamik ammaaqqissaaq. Kuultisiorfik 2021-imi tamakkiisumik tunisassiulersimassaaq. Ingerlatseqatigiiffik piiaavinnik arlalinnik ammaaniarpoq nunaqavissunillu sulisoqarluni.

Isumalluarneq annertoqaaq.

Ilami kuultimik nappaateqarnermik taaneqarsinnaagunarpoq. AEX Goldimi pisortaaneq Eldur Olafsson isumaqarpoq kujataani kuultisiorfinnut 15-20-nut periarfissaqartoq.

Aviisi AG taama allappoq.

Maannamullu kuultisiorfimmik ataatsimik ammaanissamik pilersaaruteqarpoq, tassalu Nalunatoqaq 2014-imi matuinnartariaqartoq sivisuumik aningaasatigut ingerlanerlioreerluni.

Aappaaguinnartoq AEX Gold Napasorsuami sulluliani 11 kilometerinit takinerusuni kuultimik piiaanissamik siunniussisimavoq. 2012-p ingerlanerani tamakkiisumik tunisassiortoqalissasoq pisortap naatsorsuutigaa.

- Nalunami kuulti akuitsupilussuuvoq. Tonsimut 18 grammimik kuultitaqarpoq, nalinginnaasumik 2-3 grammiusartoq. Maannakkut kuulti akiligissaarpoq ounzemut 1.500 dollarseqarluni. Tassalu grammimut 312 koruunit. Naatsorsuutigaarput Nalunami kuulti 390 million dollarsinik naleqassasoq imaluunniit 2,6 milliard koruunit. Taamaattumik isumaqarpugut kuultisiorfiup pissarsiffiginissaanut periarfissaqarluartoq, Eldur Olafsson aviisimut AG-mut oqarpoq.

Ujarassiooq Islandimiu 34-nik ukiulik AEX Gold-imi pisortaanerullunilu amerlanerpaanik aningaasaliinermigut piginneqataassutit 12-it pigalugit. AEX Gold Toronto pappilissat nalillit allattorsimaffiani allattugaavoq piginneqataasullu 200-nit amerlanerupput.

Suliffiit 100-t

Kuultisiorfimmi Nalunami ammaqqittumi suliffissat 100-t missaanniissapput. Eldur Olafssonip naatsorsuutigaa aallaqqaammut suliffiit affai nunaqavissunik inuttalerneqassasut.

- Anguniagaavorli tamakkiisumik nunaqavissunik sulisoqalernissaq. Kuultisiorfitoqqami sulisut affaasa missaat nunaqavissuupput. Sapinngisamik nunaqavissut amerlanerpaat sungiusartinniarpavut. Kuultisiorfimmi suliffissatsialaat amerlapput, oqaluttuarpoq.

Imaassagunarpoq sulisut ulluni 24-30-ni atasuinnarmik sulisarnissaat kingornalu sivisoqataanik sulinngiffeqarlutik.

Aviisimi AG-mi kuultisiornissaq pillugu atuarnerusinnaavutit. Aviisi uani ataani pissarsiariuk:

Powered by Labrador CMS