Kujataani kommunimi akiitsoqartarneq iluarsiiffigineqartoq
Aningaasaqarnermut siunnersortit marluk, ukiut marluk affarlu ingerlanerini Kommune Kujallermi innuttaasut akiitsui 3 millioningajannik ikilisippaat.
Oqaloqatigiinneq paaseqatigiiffiusarpoq, taama oqariartaaseqartoqarpoq. Taannalu kujataani kommunimi iluatsilluartumik atorneqarpoq, tassani siunnersortit marluk aningaasaqarnermik immikkut paasisimasaqartut, innuttaasut ineqarnermut akiliutinut akiitsuinik akiliisitsiortorput.
2016-imi apriilip aallaqqaataani 2018-imi septembarip aallaqqaataanut immikkut ittumik suliniuteqarnermi illoqarfinni pingasuni 891-nik oqaloqatiginninneq aqqutigalugu akiitsut 15 millionit koruuningajannit 12,2 millionit koruuninut appartinneqarsimapput.
Misiliineq issuarneqartoq
Kujataani misiliinermit paasissutissat nutaat ersarissullu, nunap sinnerani issuarneqarnissaannik aalajangerneqareersut, Ineqarnermut Naalakkersuisup Karl Frederik Danielsenip paragraf 37 naapertorlugu Stine Egedep (IA) apeqqutaanut akissutini atuarneqarsinnaapput.
Inissiaatileqatigiiffimmut INI A/S-imut akiitsoqartut, siunnersuisunit attavigineqartut attartortut 36,4 procentiisa akiitsutik ingerlaannaq akilerpaat. 21 procentiisa kingusinnerusukkut akiliinissartik isumaqatigiissusiorfigaat, 12,4 procentit akilersuinissamut aaqqiissusiorput. Taamaalilluni sinneruttut 30 procentit missaanniittut akiliisinnaanngitsut imaluunniit kommunimit akiliunneqartut sinnerupput.
Qanimut suleqatigiinneq
Siunnersortit qanimut inunnik isumaginnittoqarfik, politiit, aningaaserivik, Alloriarfik aamma INI A/S suleqatigaat, aammalu najukkani ataatsimiititalianik, akuttunngitsumik ataatsimiittartunik pilersitsisoqarnikuuvoq.
Kommunimi attartortut anisitaanissamik nalunaarfiginnissummik nassinneqarsimasut amerlassusaat allanngunnigajattoq, akissummi atuarneqarsinnaavoq.
Kujataani aningaasaqarnermut siunnersortit marluk sulisorineqartut, nuna tamakkerlugu suliniummi katillugit arfineq-pingasut sulisorineqarput.