timmissat amerlassusaat
Kujataani kissaviarsuit piaraat ikinnerusut
Kisitsisarnerit 1981-imili aallartimmata piaqqat aatsaat taama ikitsigipput
Toqunartut aamma mingutsitsisut allat avatangiisinut sunniineri misissorneqarnerinut atatillugu ukiuni 35-ini kingullerni kissaviarsuit amerlassusaat Kujataani misissorneqartarnikuupput.
Sullinernut toqoraatit DDT aamma kiffiutissat PCB-t ajoqutaasartut peerukkiartulerput. Kisianni illuanik allat mingutsitsisut takkussuupput, soorlu ikuallattunik qatsererutit - plastikkini akoorutissat allallu.
Piaqqat ikinnerusut
Piffissami 2013-miit 2016-imut timmissat inaanni nalinginaasumit piarakinneruvoq, naak pinartuunngikkaluartoq tamatuma ilisimatuut ernumatippai. Kisianni suliniut 1981-imili aallartimmat aatsaat taama ikitsigippput.
Ikiliartornerallu mingutsitsinermut attuumassuteqanngilaq.
Ilisimatuut taakkuinnaat
Ilisimatuutut misissuisut marluk ukiuni taakkunani kalaallit kissaviarsuinik misissuisuupput.
Seniorkonsulent Knud Falk aamma RUC-mi lektori Søren Møller, innaannarni tikinneqarpiarsinnaanngitsunut ukiorpassuarni qaqqasiortarput, tassani timmissat inaat 12-15-it aalajangersimasut, Narsarsuup-Qassimiut-Eqalugaarsuillu akornaniittut alakkartarpaat.
Kalaallit kissaviarsui timmissat aallartartuupput. 2012-imili timmissat ilaat niuisigut geolocatorimik ikkussivigineqarnikkuupput.
Atuaruk: Nattoralik toqungasoq arnaviaq utoqqaavoq
Taassuma timmissap ingerlaarnera nalunaarsortarpaa, timmissallu ilarpassui Amerika kujallermi aamma qiterlermi ukiisartut taakku takutippaat.
Misissueqqinneq
2015-imi aasaanerani timmissat taakku ilaat Narsarsuarmi toqungasoq nassaarineqarpoq.
Sumik toqquteqarsimanersoq misissuinerit maannamuugallartoq takutissinnaasimanngilaat, geolocatorillu takutippaa taanna Venezuelami ukiisimasoq.
Nunatsinni kissaviarsuit ammerusumik qupaloraarsuit piniagaraat, taakkulu 2013-iminngaanniit aamma amerlassusaat kisinneqartalerput, piffissarlu ungasinnerusoq eqqarsaatigalugu taakku misissuinermut ilanngunneqarsinnaapput. 2016-imi svenskit marluk suliffimmik misiliisut suliniummut ilaapput timmiaaqqanik kisitsisuullutik.
Issittumik Siunnersuisoqatigiit avatangiisimik nakkutilliineranni taakku paasissutissat amerlasuut ilanngunneqassapput.
Atuaruk: Appat eqqisisimatilluinnarnissaat pilersaarutaanngitsoq