Kujataani inunnik marlunnik ajunaartoqarpoq ataaseq suli ujaarineqarluni
Narsamit sisamanngormat angallammik aallartut politiinit aamma Issittumi Sakkutuunit ujaarineqarput. Inuit marluk ajunaartut nassaarineqarput, pingajuat suli ujaarineqarpoq.
Narsamit Qaqortumut angallammik aallartut sumiiffeerunneqarnerannik politiit nalunaarfigineqarput tallimanngormat nalunaaqutaq 12.40.
Narsamit Qaqortumut angalaneq akunnermi ataatsimi sivissussuseqartarpoq, inuit pingasut Qaqortumut apuuffissaminnut tikissimanngitsut politiit nalunaarfigineqarlutik.
Politiit aquuteralaat, sakkutuut umiarsuaat Thetis, qulimiguulik Seahawk kiisalu qulimiguulik Bell212 ujaasillutik aallartipput nalunaarfigineqareernermi kingorna.
- Angut arnarlu ajunaarsimasut nassaarineqarput nalunaaquttap 16.00-ip missaani, politiinit Brian Thomsen Sermitsiaq.AG-mut oqarpoq.
Silarluttoq
Ujaarineqartut pingajuat ajunaarsimanissaa ilimagineqarpoq - taannali suli nassaarineqanngilaq. Naak sila atoruminanngikkaluartoq suli ujaasisoqarpoq.
Sila apivoq erseqqarinnanilu.
- Sila atoruminarnerulissaaq, taamaalereerpat aamma atoruminaasseqqissaaq, tamanna ujaasinermut sunniuteqassaaq. Taamaattoq ujaasineq unitsinneqassanngilaq, Brian Thomsen oqarpoq.