Kujataani internetti qameqqinneqassaaq
Internetti pingasunngorpat qaminneqassasoq naatsorsuutigineqarpoq. Iluarsaassivissamili sikorsuaqarpoq
Umiarsuaq imaatigut kaabelimik aaqqissuussisussaq sapaatiummat Qaqortup avataani ajutoorfiusumut apissippoq. Sumiiffik sikorsuarnik qallerneqarsimavoq, taamaasillunilu umiarsuup aaqqissuussisinnaanissaralua pinngitsoortillugu.
Tele-Post ingerlatsinermi paasissutissiiviani ilisimatitsivoq.
Pingasunngornermi qaminneqassaaq
- Umiarsuup inuttai peqatigalugit silap pissusaa nalilersuunnavippaat, ilimasaarutillu malillugit, Tele-Postimit aalajagiunneqarpoq inuinnaat internettimik atuisut attaviinik matusigallarnissaq pingasunngorpamut kinguartinneqarallassasoq, ilisimatitsissutigineqarpoq.
Pilersaarutilli silap sikullu allanngorarneri malillugit aamma allanngorsinnaassapput, taamaattumillu matusigallarnissaq siusinnerusukkut peratarsinnaassalluni. Taama pisoqassagaluarpat atuisut Tele-Postimit ilisimatinneqarumaarput.