Kujataani innuttaasut avatangiisinut navianartunut eqqaavilersorneqartut

Eqqakkat avatangiisinut navianartut eqqakkanit allanit immikkoortinneqarnissaat pillugu erseqqilluinnartunik malittarisassaqanngilaq. Taakku kommunimiit kommunimut assigiinngitsumik isumagineqartarput.

Kommuni Kujallermi eqqakkat avatangiisinut navianartut soorlu batteriit, elektronikkit mikisualuit ilaatigut oqarasuaatit angallattakkat, nujaajaatit, putsunut kalerrisaarutit, eqqiaanermut atortut sakkortuut puukui, qalipaatit, akorutissallu ulorianassutsimik ilisarnaatillit karsimut aappalaartumut iginneqartalissapput.

Kommuni Kujallermi ingerlatsinermi allaffissornermilu pisortap Sem Simonsenip erseqqissaassutigaa, eqqakkat immikkoortiterneqanngikkaangamik avatangiisinut ajoqusiisartut.

- Neriuppunga karsit atorluarneqarumaartut, angerlarsimaffippassuarnimi eqqagassat suulluunniit eqqaavimmut ataatsimut eqqarneqartarput. Tamaalillunilu eqqakkat ikuallaavimmi ikuallanneqartussaanngikkaluit ikuallanneqarsinnaasarput, ajoraluartumillu taakkuupput ikuallaavimmut aserorsaataasartut avatangiisimullu minguttitsisuullutik. Taamaattumik neriuppunga eqqakkanut avatangiisinut navianartunut eqqaaviit atorluarneqarumaartut, Sem Ottosen oqarpoq.

Nunap immikkoortuini assigiinngitsuni assigiinngitsunik aaqqiissuteqartoqartartoq

Kommunimit inassutigineqarpoq, karsi silamiitinneqassasoq, ulikkaaraangallu kommuni oqarasuaatikkut nalunaarfigalugu qinnuigineqartassasoq karsimik silamiittumik aalleqqullugu.

Containerit igalaaminernu qillertuusanullu eqqaaviusussat illoqarfinni nunaqarfinnilu kommunimit inissititerneqareersimapput, ingerlatsinermilu pisortaq naapertorlugu taakku atorluarneqarput.

Eqqakkanik ingerlatseqatigiiggimmi Esani A/S-imi pisortap Frank Rasmussenip taamatut nutaamik aaqqissuussisoqarsimanera nuannaarutigaa.

- Kujataani ajunngivissumik aaqqissuussisimapput. Aaqqissuussat allat assigalugit, taamatut aaqqiissuteqarsimaneq innuttaasunut arlaatigut akeqartussaavoq, tamanna Kommuni Kujallermi ileqquuvoq.

Miljøbil virkede ikke

Kommuneqarfik Sermersuumiittumi Nuummi innuttaasut eqqakkatik ulorianartut namminneerlutik eqqagassaleriffimmukaattussaavaat. Tassani aamma periutsit allat misilinneqarsimapput.

- Ukiualuit matuma siornatigut biilit avatangiisinut iluaqutaasussat atorlugit innuttaasut eqqagaannik sapaatikkut katersisarsimavugut. Tamannali ornigarneqarpallaasimanngilaq, taamaammat aalajangersimavugut aningaasat allanut atoraanni pitsaanerusoq.

Pisortap erseqqissaatigaa, suliffeqarfiit eqqagaat avatangiisinut ulorianaatillit pingaarnerutinneqartuusut, suliffeqarfiimmi eqqagaat inuinnaat eqqagaannit ulorianarnipilussuusarmata.