inissiat
Kujataani borgmesterip akiligassanut ilanngaatsittoqartalernissaa kissaatigaa
Kommune Kujallermi borgmesterip ineqarnermut naalakkersuisoq, ineqarnermut akiitsulinnut kiffaq-kontomik eqqusserusunnani marlunngornermi nalunaaruteqartoq, isumaqatiginngilaa
Kommuneq Kujalliinnarmi Inip attartortui 149-it, Inip nuna tamakkerlugu akiitsoqarneri pissutigalugit anisitassaanut 398-inut ilaapput.
Ineqarnermut, sanaartornermut attaveqaqatigiinnermullu naalakkersuisup, Atassummeersup Knud Kristiansenip, kiffaq-kontomik, tassa aningaasarsiat tigutinnagit akiligassanut ilanngaatsittarnermut qulakkeerinnissinnaasumik, eqqussisoqarsinnaanera kissaatiginagu oqaatigaa.
- Taama sakkortutigisumik inummut kiffaanngissusiiasussamut iliuuseqarnissara tunuarsimaarfigaara. Akiligassaqalertartummi attartorpassuarnut piffissaq eqqorlugu akiliisartunut sanilliullugit ikinnerujussuupput, Knud Kristiansenip kiffaq-kontomut tunuarsimaarnini taama marlunngornermi ualikkut tunngavilersorpaa Sermitsiaq.AG-mut.
Borgmesterip savalimmiormiut periusiat atorusuppaa
Kisianni naalakkersuisup taamaaliorusunnginnera Kommune Kujallermi borgmesterimit tigulluarneqanngilaq, taassuma kommuniani Inip attartortuini anisinneqartussani 89-it Narsami najugaqarput.
Jørgen Wæver Johansen oqaluttuarpoq Kommune Kujalleq siornali Namminersorlutik Oqartussanut attaveqareersimasoq savalimmiormiut periusiat atorlugu akiligassanut kinguaattoorutinullu aningaasarsianit ilanngaassisoqartalernissaanut eqqussisoqarnissaanut kissaateqartoqarluni.
- Namminersorlutik Oqartussat siunnersuupput tigulluarpaat, akineqarpugullu Namminersorlutik Oqartussanit tamaaliorsinnaanerup inatsisitigut aporfigisinnaasai misissorneqarniartut, kiisalu Kommune Kujalleq periutsimut taamaattumut misileraaviulluni januaarip aallaqqaataanit 2016-imit atorneqarsinnaassasoq, Jørgen Wæver Johansen Sermitsiaq.AG-mut oqaluttuarpoq.
Jørgen Wæver Johansenimmi oqaluttuarnera malillugu savalimmiormiut kiffaq-kontomut eqqaanartumik periutsimik ukiuni arlaqalersuni atugaqarsimapput, tassa qitiusumit aningasarsiat akiligassanut pisortanullu akiitsorilerneqarsimasunut ilanngareerneqartarsimammata aningaasarsiat tunniunneqannginneranni.
- Sooq periuseq Savalimmiuni iluatsissimasoq, sulilu maannamut iluatsittumik atorneqartoq tamaani atussanngilarput?, Wæver Johansen aperivoq.
Taamaattumik Kommune Kujallermi borgmesterip aningasarsianit ilanngaassuisinnaanermut periusaasinnaasoq pillugu ineqarnermut naalakkersuisoq sapaatip akunnerata tulliani Nuummukaruni oqaloqatigerusuppaa.
Jørgen Wæver Johansenip ilanngullugu ilisimatitsissutigaa kommunip inunnik isumaginninnermi immikkoortortaqarfiata kujataani anisinneqartussat 149-it aningaasaqarnermikkut atugaat naliliiffigissagaat, ikiorneqarnissaminnullu pisinnaatitaaffillit ikiorsiiffigalugit.