Kujataani atortussiassat
Aqerluusassaq, saffiugassat qaqutigoortut aamma kuulti Kujataanut suliartorusuttunut pilerinarsaaqataassapput. Siunissamimi piiaaffinngortussani nunaqavissut 400-nit amerlanerusut sulisussatut pisariaqartinneqartussaammata.
Kommune Kujallermi borgmesterip Stine Egedep ukiortaami oqalugiaammini Kujataani atortussiassanik piiaaffissatut pilersaarutit, annerujartuinnartumik nunaqavissunik sulisoqarnissaminnik pisariaqartitsisussat isumalluarfigisorujussuugini oqaatigaa.
Aviisi Sermitsiaq taama allappoq.
Tamatumani ingammik pineqarluni GreenRoc Miningip Nanortallip eqqaani qeqertami Amitsumi aqerluusassamik piiaanissaminik pilersaarutaa taassumalu qanittuaniittumi Amaroq Mineralsip Nalunami kuultimik piiaanissaminut pilersaarutaa, nunaqavissunik 40-nik maanna sulisoqartoq. Pilersaarutigineqartut aallartilluariarunik amerlanerusunik sulisoqarnissaminnik pisariaqartitsisussaapput. Taakku saniatigut Tanbreezip Killavaat Alannguanni saffiugassanik qaqutigoortunik piiaanissamut pilersaarutaa nunaqavissunik amerlasuunik sulisoqarnissaminik aamma pisariaqartitsisussaavoq.
- Aatsitassarsiortitseqatigiiffiit Majoriamik suleqateqartussaapput. Aatsitassarsiortitseqatigiiffiit akuttunngitsumik ataatsimeeqatigisarpavut, taakkulu suliniutiminni sumut killinnerminnik ilisimatittarpaatigut. Ataatsimoorlutalu qaqugu aamma qanoq iliorluta nunaqavissunik amerlanerpaanik sulisussarsisinnaanissarput pilersaarusiortussaavarput. Inuusuttortatta sapinngisamik amerlanerpaat siunissami piiaaffinni sulilersinnaanissaannut piukkunnarsarsinnaanissaat, soorunami neriuutigaarput. Taamaalilluta suliassaqarfinni assigiinngitsuni ullutsinnisut avataanit sulisorpassuarnik tikisitsisariaqannginniassagatta, Stine Egede Sermitsiamut oqarpoq ilanngullugulu oqaatigalugu tamanna suliassaasoq angisooq, inuusuttummi amerlavallaat suliffeqanngimmata imaluunniit suliffimminnik paarsisinnaanngimmata.
Aviisimi Sermitsiami atuarnerusinnaavutit. Aviisi uani pissarsiariuk:
