Kujataani atortussiassanik piiaanissamut sorsuuteqarneq ingerlaannartoq
Greenland Mineralsiusimasup ullumikkullu Energy Transition Mineralsimik taaguuteqalersimasup nittartakkamigut saqqummiussimavaa, Kuannersuarni misissuinissamut akuersissutini nutartertissimallugu. Qinnuteqaammullu ilanngussamik nassiussisimalluni.
Energy Transition Minerals Kujataani Narsap eqqaaniittumi Kuannersuarni aatsitassanik qaqutigoortunik saniatigullu uranimik piiaanissamut akuersissummik qinnuteqaamminut ilanngussisimavoq. Ilanngussami siunnersuutigineqarsimavoq allatut aatsitassarsiortoqassasoq, tassani urani tuniniarneqarani igitassatut isigineqassasoq tailingisillu sinnerinut peqatigitillugu nunamut toqqorterneqassasoq.
Suliffeqarfimmilli aamma allapput, Kuannersuarni atortussiassani aningaasarsiutaasinnaasunik tamanik (urani ilanngullugu) piiaanissamut akuersissummik aallaqqaammut qinnuteqaatigineqarsimasoq suli attatiinnarneqartoq. Urani suliffeqarfimmut 50 millioner dollarsinik isertitsissutaassasoq naatsorsorneqarsimavoq.
Naalakkersuisut suliamik suliarinnittut
Aatsitassanut Inatsisinillu Atuutsitsinermut Naalakkersuisoqarfimmi pisortap Jørgen Hammeken Holmip Sermitsiaq.AG-mut uppernarsarlugu oqaatigaa, Kuannersuarni aatsitassarsiorniarneq pillugu suliami nutaamik takkuttoqarsimasoq.
- Atortussanik allanik taakkunannga (Energy Transition Minerals) tigusaqarsimavugut, taakkununngali atatillugit uppernarsaatit suli pissarsiarinngilavut. Naalakkersuisut qinnuteqaammik nutaamik qanoq suliarinnissanerlutik maannakkorpaq eqqarsaasersuutigaat.
Ingerlatseqatigiiffiup piiaanissamut akuersissummik qinnuteqaamminut ilanngussaqarnermi saniatigut misissuinissamut akuersissunni ukiunik pingasunik sivitsortissimavaa.
Tamanna pisimavoq, Namminersorlutik Oqartussat piiaanissamut akuersissummik qinnuteqaammut itigartitsissutaasa Energy Transition Mineralsimut tusarniaassutigineqarnerani.
- Inatsit naapertorlugu taamatut iliortoqartussaavoq. Taamaallaat suliffeqarfik pisussaaffimminik naammassinnissimanngippat, akuersissutip tunuartinneqarnissaa piumasarisinnaavarput. Pisussaaffitsik naammassisimavaat, taamaammat misissuinissamut akuersissutaat sivitsorneqarsinnaatitaavoq, naalakkersuisoqarfimmi pisortaq Jørgen Hammeken Holm oqaluttuarpoq.
Itigartitsissut piffissami sivisuumi akiniarneqarsimasoq
Aatsitassanut Inatsisinillu Atuutsitsinermut Naalakkersuisoqarfimmit Greenland Mineralsiusimasup piiaanissamut akuersissummik qinnuteqaataanut itigartitsissutissatut missingiut juulip qaammataani ingerlatseqatigiiffimmut nassiuppaa, taamanikkut ingerlatseqatigiiffik oqaaseqaateqarnissamut sapaatip-akunnerinik sisamanik piffissalerneqarluni.
Greenland Mineralsip aningaasarsiornermi aqutsisuata Garry Frere-p septembarip qaammataani Sermitsiaq.AG-mut ilisimatitsissutigaa, ingerlatseqatigiiffimmi oktobarip naanerani akissuteqartoqarnissaa naatsorsuutigineqartoq. Qaammatilli sisamat ingerlareersut suli tamanna pisimanngilaq, tamatumunngali nassuiaatissaqartoq, naalakkersuisoqarfimmi pisortaq ilisimatitsivoq.
- Energy Transition Mineralsimit suliamut tamarmut tunngatillugu pappiliaatinik takunnikkusuttoqarsimavoq, takunnissinnaatitaappullumi. Tamanna maannakkorpiaq suliaraarput, sapaatillu-akunnerani matumani akissuteqartoqarnissaa naatsorsuutigalugu.
Akissuteqarutta ingerlatseqatigiiffik uppernarsaatinik arlalinnik tunineqassaaq, tamatumalu kingornatigut piiaanissamut akuersissummik qinnuteqaammut itigartitsissutaasumik tusarniaanermi akissuteqarnissamut nutaamik piffissaliisoqassalluni.