Kujataani aatsitassarsiornermik suliniut assortuussutaasoq pingaarutilimmik angusaqalersoq
Kuannersuarni suliniummi VSB-mik nalunaarusiamik taaneqartartoq, tuluttut oqaasertaqartoq Inuussutsissarsiornermut Naalakkersuisoqarfimmit akuerineqarpoq.
VSB-mik nalunaarusiaq, inuiaqatigiinni piujuartussamik iluaqutaasumik sunniutaasussanik nalilersuinermik nassuiaasoq, qallunaatuunngorlugu kalaallisuunngorlugulu nutserneqareerpat tusarniaassutigineqassaaq.
Alloriarneq pingaarutilik
- Inaarutasumik akuerineqarnissamut suliaqarnitsinni alloriarneruvoq pingaaruteqarluinnartoq pitsaalluinnartorlu, Greenland Mineralsimi pisortaaneq, John Mair, KNR-imut oqarpoq.
Greenland Mineralsip ASN-mik nalunaarusiaq, avatangiisinut sunniutissanut tunngasup akuerineqarnissaa suli amigaatigaa, taanna innuttaasut immikkut sammivaat.
ASN piariingajalersoq
KNR-ip allaaserinninnera naapertorlugu, Aatsitassanik Suliassaqarfinnut Avatangiisinut Aqutsisoqarfik, ASN-imut nalunaarusiami inatsisinut naammassinninnissamut aaqqitassanik assigiinngitsunik utaqqisaqarpoq. Ingerlatseqatigiiffiup sapaatip-akunneri arlaqanngitsut qaangiuppata aaqqiissutit tunniunneqarnissaat, John Mairip naatsorsuutigaa.