Kujataani aatsitassanik suliniummut erngup nukinga
Aatsitassarsioqatigiiffik Tanbreez tunisassiornermi erngup nukinganik pilersorneqarnissaq pillugu Nukissiorfinnut isumaqatigiissusiorsimavoq. Tamatumali suliniut mingutsitsinngitsutut piujuaannartitsisutullu pissuseqalerseqqajarnavianngikkaa, avatangiisinik illersuiniaqatigiiffimmit, suliniummut qularinnittorujussuusumit, oqaatigineqarpoq.
Australiamiut aatsitassarsioqatigiiffiat Tanbreez, Kunataani Killavaat Alannguanni ukiuni 30-ni piiaanissamut akuersissummik siorna aggustimi nalunaarfigineqartoq, tunisassiornermi erngup nukinganik pilersorneqarnissani pillugu Nukissiorfinnut isumaqatigiissusiorsimavoq.
Aviisi Sermitsiaq taama allappoq.
Tamatumunnga atatillugu Tanbreez attaveqaatit aqqusersuutillu pisariaqartut aningaasaliiffiginissaannut pisussaaffilerpoq. Tamanna tusagassiuutitigut nalunaarummi tamanut saqqummiunneqaqqammersumi atuarneqarsinnaavoq.
- Erngup nukinganik nukissamik aallerfittut atuinissamik suleqatigiinnissaq pillugu isumaqatigiissut tamanna isumaqassaaq, Tanbreezip CO2-mik artukkiissuteqarnaviannginneranik, Greg Barnes oqarpoq maluginiarlugu, saffiugassanik qaqutigoortunik suliniutit amerlanertigut CO2-mik annertoorujussuarmik artukkiisartutut ilisimaneqartartut, tamannalu saffiugassat qaqutigoortut CO2-mik aniatitsinerit annikillisarneqarnissaannut amerlanertigut atorneqartarnerisa akerliattut taaneqarsinnaavoq.
Maluginiarneqarsimanngitsut
Avatangiisinilli illersuiniaqatigiiffimmi Noah-mi oqaaseqartartup Niels Henrik Hoogep Tanbreezip suliniutaani mingutsitsisoqannginnissaa takusinnaannginnerarpaa.
- Tamanna assersuukkusuppara Brasiliami naalakkersuisut siallersartup orpippassuinik aaqqissuussaasumik ikuallaasarnermik ”mingutsitsinnginnertut” oqaatiginninnerannut, oqarlutik nersussuup neqaanik akuutissalersugaanngitsumik tunisassiornissaq siunertaralugu taamaaliorlutik. Tanbreezip suliniutaa suliarinninneq imarisaalu eqqarsaatigalugit piujuaannartitsinngilluinnarneruvoq.
Aviisimi Sermitsiami atuarnerusinnaavutit. Aviisi uani pissarsiariuk: