udvikling
Kujataa Aarhusilu suleqatigiinnissamik isumaqatigiissuteqarput
Aarhus Kommune aamma Kommune Kujalleq suliniutissanik isumaqatigiissuteqarput Kujataani nunalerinermik inuussutissarsiornermillu nukittorsaasussamik
Kommune Kujalliup Aarhusimi arfininngormat Tall Ship Racemi umiarsuarmi ilinniarfiusumi Danmark-imi ilassinninneranut atatillugu borgmester Jacob Bundsgaard-ip, Aarhus Kommune, aamma borgmester Jørgen Wæver Johansenbip, Kommune Kujalleq, Kujataani EU-mi suliniutit ineriartortinnissaannik suleqatigiinnissamik isumaqatigiissut atsiorpaat.
Isumaqatigiissutip kingunerisaanik EU-mi sulisoq Bruxellesimi Midtjyllands EU-Kontor-ianeersoq Kommune Kujallerukassaaq EU-mit tapiissutinik periarfissat misissorniarlugit kiisalu kommuni inuussutissarsiortullu ataatsimeeqatigiartorlugit, suliniutinut qinnuteqarnissaq ineriartortitsinissarlu siunertaralugit.
Aarhus Kommune Kommune Kujallermut piginnaassutsinik ineriartortitsinermik atugassaqartitsissaaq coaching-imik, najoqqutassiuinermik attaveqarfinnillu pilersitsinermik. Isumaqatigiissutip ilanngullugu kinguneraa kommunimi piginnaasanik ineriartortitsineq, Aarhus Universitetimi ilisimatusarnermi tapiissuteqarnermut immikkoortoqarfimmit aamma Brusellesimi Midtjyllands EU-Kontor-imit.
Tall Ship Racemik aaqqissuussinermit asserpassuit takukkit
Kujataani nunalerineq ineriartortinniarlugu Aarhus Kommunep Videncenter for Landbrug-imik Agro Food Park-imilu ingerlatsisunik allanik suleqatigiinnermut periarfissat tapersersorniarpai, taamaasilluni Kommune Kujallermi pisariaqartumik piginnaasat ineriartorteqqinniarlugit.
Isumaqatigiissutip atsiornerani borgmester Jakob Bundsgaardip nuannaarutigalugu oqaatigaa ikinngutigiinnermik suleqatigiinneq isumaqatigiissummik piviusumik kinguneqarsimammat neriorsuillunilu Aarhus Kommune ingerlatamut tamarmut ikiuutissasoq, aammalu Aarhus Kommune siunissami isumaqatigiissutinut taamaattunut ammassasoq.
Borgmester Jørgen Wæver Johansenip oqaatigaa Kommune Kujalliup kommunit taakkua marluk nutaamik suleqatigiilernerat iluarisimaaraa Kujataatalu ineriartortinnissaanut EU-mi tapiissutit atornissaannut qinnuteqarnissamut periarfissat , minnerunngitsumik nunalerinermi EU-p misilittagaqarfigilluagaani, qilanaarigai.