Kujallermit ilaasut ingerlariaqqissinnaajunnaarsimasunut ikiorseqquneqartut
Ilaasut arlallit Qaqortumi ingerlariaqqissinnaajunnaarsimasut Qaqortumi uninngapput, taamaammallu immikkut ittumik iliuuseqartoqartariaqartoq, kommunimit oqaatigineqarpoq.
Arctic Umiaq Line ilaasoqaqqissinnaanngikkallarpoq, Air Greenlandilu januaarip 16-iata tungaanut kiffartuussiveqarfiunngitsuni bilitsinit tunininaajunnaarallarluni. Tamaammat ilaasut arlallit Qaqortumiit ingerlariaqqissinnaanngillat.
Kommuni Kujallermit piumasarineqarpoq: Ilaasut ingerlariaqqissinnaanngitsut immikkut timmisartumik qulimiguulimmillu ingerlanneqartariaqarput.
- Ilaasut Qaqortumit ingerlariaqqinneq ajulersut qaammatip affarsuani angerlamut apuunneq ajuleqqasussaajunnaarlugit immikkut iliuuseqartoqartariaqartoq isumaqarpugut.
- Ilinniartoqarpoq aqaguinnannguaq soraarummeertussanik, suliartortussaqarporlu, aammalu angalasoqarpoq sulinerminnut atatillugu Nuummiit allanut ingerlaqqittussanik, kommuni tusagassiorfinnut nalunaaruteqarluni allappoq.
Ilaasut sumiginnarneqarsimasut misigisimasoq
Arctic Umiaq Linep tallimanngornermi ualikkut nalunaarutigaa, Sarfaq Ittummi inuttat akornanni coronamik tunillatsittoqarsimaneranik pasitsaassisoqarmat, umiarsuaatileqatigiiffik Qaqortumiit ilaasussanik ikisisinnaasimanngitsoq.
Borgmesterip Stine Egedep (IA) Sermitsiaq.AG-mut erseqqissaatigaa, kommuni iliuuseqaqqusisoq, sapaatip-akunnerata matuma naanerani ilaasut 55-it missaanniittut Sarfaq Ittummut ilaallutik Nuummukartussaagaluit sumiginnarneqarsimasutut isigingamikku:
- Ilaasut paasissutissinneqartannginnertik nuannarinngilluinnarpaat. Arctic Umiaq Linemit ilisimatinneqaannartarsimapput, bilitsimut akiliutigisimasaat utertinneqassasut.
- Ingerlatseqatigiiffiup taamak angitigisup ilaasuminnut taamatut sumiginnaasinnaanerat ilumoortuusinnaanngilaq, Stine Egede oqarpoq. Oqaatigalugulu, ilaasorpassuit sinersortaammik atuerusunnerusartut, timmisartornermiit akikinnerummat.
Affaat akunnittarfimmi inissinneqartut
Borgmesterip oqaluttuaraa, kommunip ingerlariaqqissinnaajunnaartut unuiffissaannik neqeroorfigisimagai, affaasalu missaanniittut akuersaarsimasut.
- Inuit taakku sinnerlugit qisuariarpugut.
-Pisoq immikkut ittuuvoq kialluunniit piareersimaffigisinnaanngisaa. Ingerlatseqatigiiffik ilaasoqaqqusinngimmat paasilluarsinnaara. Taamatummi inissinneq ingerlatseqatigiiffimmut pitsaanngimmmat, neriuutigaaralu aaqqiissutissarsiumaartut.