Kujallermi Siumut: IA ataatsimiititaliani aamma sullarluppoq
IA-p Atassummik suleqatiginnikkunnaarnerata kingorna Siumup IA isornartorsiorpaa ataatsimiititaliani sulinera naammaginagu. IA-p ataatsimiititaliani sulinera taamatulli ajortigaaq, Siumumit Anders Olsen isumaqarpoq.
Kommune Kujallermi Inuit Ataqatigiit Atassummut suleqatigiinnertik unitippaat, Atassutip ataatsimiititaliami siulittaasuuffimmini naammaginanngitsumik sulinera pissutigalugu.
- Nammineq qanoq iliornerlusi qiviaqqaarlugu allat tikkuartorsigit.
Anders Olsen, S, Kommune Kujallermi kommunalbestyrelsemi ilaasortaq taama isumaqarpoq.
Taassuma tusagassiorfinnut nalunaarutimini oqaatigaa IA ataatsimiititaliani siulittaasuuffigisamini akisussaaffimmik naammaginanngitsumik tigumminnittoq.
Ataatsimiinnernit imaqarniliat piffissaatillugu atsiorneqarneq ajorput, piffissaq kingulleq atorlugu ataatsimiinnissanut aggersaasoqartarpoq, oqaluuserisassallu piareersarluarneqarsimannginnamik kinguartinneqartarlutik. Pissutsit taamaattut Siumut Kujallermi IA-mut isornartorsiutigisimavaat.
- Siumumit arlaleriarujussuarluta ataatsimiititaliani siulittaasut ingerlatsineri naammaginannginnerarlugit uparuartarnikuuagut, ilaatigut kommunalbestyrelsip ukiarmi ataatsimiinnerini qaqilertarlugit, Anders Olsen tusagassiorfinnut nalunaarummi allappoq.
Oqaluuserisassat ilaat kinguartinneqartariaqarsimasoq tassaavoq missingersuut 2022-moortoq.
Unneqqarillusi
Siumumit Anders Olsenip IA unneqqaserlunnerarlugu isornartorsiorpaa, Atassullu pisuutillugu suleqatiginnikkunnaarneraalluni.
- Taamaammat Siumut isumaa naapertorlugu Inuit ataqatigiit suleqatigisimasaminnut kisiat pisuutitsiniarnera inissaminiinngilluinnarpoq, Anders Olsen oqarpoq IA-llu unneqqarinnissaa piumasaralugu.
Teknikkimut Avatangiisinullu Ataatsimiititaliami siulittaasoq, Piitaq Lund (IA) nassuerutigaa qinigaaffiup aallartinnerani ataatsimiinnissat ilaat kinguartinneqartariaqartarsimasut.
Siumulli isornartorsiuinera ilisarisinnaannginnerarpaa, ataatsimiititaliamilu siulittaasut uninngaannannginnerat oqaatigalugu.
- Ataatsimiinnissanik oqaluuserisassanillu kinguartitsisariaqartarnermut pissutaapput kommunip aningaasaqarnera qinigaaffiup aallartinnerani torersaqqaartariaqarsimagatsigu, taamatullu pisortaagallartut taarserlugit pisortanik atorfinitsitsiortortariaqarsimagatta. Suliassat pisariaqarluinnartut siulliussimapput, ataatsimiititalianilu ataatsimiinnissat pisariaqartumik kinguartinneqartariaqarsimallutik, Piitaq Lund Sermitsiaq.AG-mut oqarpoq.