Kujallermi Siumut: Borgmesteri akuleruttariaqarpoq
Qaqortumi mittarfissaq pillugu ersarissumik nalunaaruteqartoqarnissaanut borgmesteri Stine Egede qanoq iliuuseqartariaqalersoq, Kommune Kujallermi illuatungiliuttut isumaqarput. Borgmesterip Naalakkersuisut utaqqimaaqaarusuppai.
Kujataani innutaasut Qaqortumi mittarfittaassanerlutik suli nalornissutigivaat. Qaqortumi mittarfissaq sanaartorneqarnissaa borgmesterip Stine Egedep (IA) qulakkeerniartariaqaraluaraa, borgmesteriusimasoq Simon Simonsen isumaqarpoq.
- Borgmesterimiit tusagaqaavinnikuunngilagut Qaqortumi mittarfissaq pillugu massakkut arlaatigut suliarineqartariaqarneranik oqariartortumik. Tamattaalluta siuttuuffigaatsigut, taamaattumik Naalakkersuisunut mittarfik naammassineqarnissaanut noqqaasuteqartariaqaraluarpoq. Parteeqatigigaluarunigilluunniit, Simon Simonsen (S) Sermitsiaq.AG-imut oqarpoq.
Suliariumannittussarsiuusseqqinnermi akikinnerpaamik neqeroorutigineqarsimasut milliardit koruunit sinnerpai. Sanaartornissaq taama akisunerutigineranut tunngatillugu Naalakkersuisut misissueqqissaarniarlutik aalajangerput.
1500 meteri qulakkeerneqartariaqarpoq
Qaqortumi mittarfissaq 570 millionit koruuneqarnissaa Naalakkersuisuusimasut naatsorsuutigisimagaluarpaat. Maanna Naalakkersuusut sipaarniassallutik aalajangerpata mittarfik naanerunissaa Simon Simonsenip aarleqqutigaa.
- Qineqqusaarutigineqarnikuuvoq Qaqortoq pinngitsoornani mittarfittaassasoq. Maanna tusatsiartaqattaarparput naaliniarneqartoq. Minnerpaamik takissusissaq 1500 meteri qinnutiginikuuarput. Taanna piviusunngortinneqartariaqarpoq, Simon Simonsen oqarpoq.
Borgmesteri erseqqissumik Naalakkersuisunut innuttaasunullu Qaqortumi mittarfissap 1500 meterisut takissuseqarnissaanik avammut nalunaaruteqartariaqartoq, taanna naqissusiivoq.
Borgmesterip Naalakkersuisut utaqqimaaqaarusuppai
Naalakkersuisut mittarfissaq pillugu sukuiaanerat augustimi naammassinissaanut Stine Egede utaqqimaaqaarusuppoq.
- Naalakkersuisut Inatsisartullu suliassartik sukumiisumik suliarissagaat upperaara. Naalakkersuisut misissuinerat naammassitinnagu avammut nalunaaruteqarnavianngilanga, Stine Egede (IA) oqarpoq.
Kommunalbestyrelsi mittarfissaq pillugu kommunalbestyrelsit ataatsimiineranni nalunaaruteqarfigisimallugit taanna erseqqissaavoq.
- Attaveqaqatigiinnermut Naalakkersuisoq, Naaja Nathanielsen saaffinnippoq maanga kommunimut kommunalbestyrelsi siullerpaatillugu saqqummiuffigerusullugu. Saqqummiussassat augustimi piareerpata. Ukiuni 40-ni utaqqisinnaagutta, taava qaammat ataaseq utaqqisinnaasaagut, Stine Egede oqarpoq.