Kujallermi Siumut peqataatinneqanngilaq
Ataatsimiititaliani ilaasortaaffissat Siumumut isumaqatigiissutigineqanngitsoorput. Inuit Ataqatigiit Atassullu Kommune Kujallermi kommunalbestyrelsemi suleqatigiinnissamut isumaqatigiissummik kisimik atsioqatigiissapput.
Kommune Kujallermi anguniakkanut isumaqatigiinniarnerni Siumut peqataassanngilaq. Inuit Ataqatigiinnit Stine Egede nalunaaruteqarpoq.
Inuit Ataqatigiit aamma Atassut taamaasillutik Kujallermi isumaqatigiissummik atsioqatigiittussanngorput, Siumullu illuatungiliuttunngorluni. Atassut aamma IA kommunalbestyrelsemi qulingiluanik ilaasortaatitaqartoq Siumut arfinilinnik ilaasortaatitaqarpoq.
- Suleqatigeerusunnerugaluaq iluatsinngimmat uggoraara, kisianni allannguerusulluta
qineqqusaarsimanerput piviusunngortikkusukkatsigu tassunga killittariaqarsimavugut, Stine Egede tusagassiorfinnut nalunaarutimini allappoq.
Taanna nassuiaavoq isumaqatiginninniarnerigaluani Siumullu ungasillineruinnarsimallutik, qanilliallagatik.
Siumut naammaginninngitsoq
IA Stine Egede siuttoralugu Siumumut assamminik isaassisimavoq. IA-li isumaqarpoq Siumut neqeroorutigineqartunik naammaginninngitsoq:
- Neqeroorutivut: ataatimiititaliat marluk, ataatimiititalianilu ilaasortaaffiit tamakkiisut, tassalu ataatimiititaliani tamani marlunnik ilaasortaatitaqarneq kiisalu 2. viceborgmesteri qujarunneqanngillat.
- Taamaakkaluartoq ajoraluartumik neqeroorutivut naammagineqanngimmata, Siumumik
oqaloqatigiinneq tassunga killittariaqarsimavarput, Stine Egede allappoq.
Inuit Ataqatigiit naatsorsuuteqarput ataatsimiititaliani partiinut tamanut suleqatigiinnerit pitsaasumik ingerlajumaartut. Stine Egede ilisimatitsivoq inissititertumik ataatsimiinneq 1. maj pissasoq.
Siumut isornartorsiuineq ilisarinngilaa
Siumumit Simon Simonsenip IA-p neqeroorutaannut Siumut naammaginnissimannginnera ilisarisinnaannginnerarpaa. IA aamma Siumut suliassat pillugit ippassaq oqaloqatigiissimapput, Siumulli isumaqatiginninniarnernit peqataajunnaartinneqarsimalluni.
Simon Simonsen naapertorlugu Siumut IA-p neqeroorutaannut akuersaarsimagaluarput, kommunalbestyrelsemilu ilaasortaatitat aallaavigalugit ataatsimiititaliani ilaasortaaffissat naammattut pigisassatik tigummiinnarumasimallugit.
- Ukiuni sisamani tullernut suliassaqarfiit pingaartitallu pillugit oqaloqatigiinnissamik piumasaqaraluarpugut. Tamannali unissutigaat, allannguinissamik oqariartorlutik qineqqusaaramik. Qanorli allanngortoqassanersoq suli ersarissanngilaat. Taamaattoq ilisarisinnaanngilara naammaginninngitsutut oqaatigineqarnerput, Simon Simonsen Sermitsiaq.AG-mut oqarpoq.
- IA-p ullormiit ullormut pisut aallaavigalugit politikkeqarlutik sulinissamik oqariartornerat nangiaraarput, ersarissunimmi allatanik anguniagaqarnissaq kissaatigigatsigu, oqarpoq.
Taanna oqarpoq ataatsimiititaliani sulinerni Siumut suleqataasarumaartoq naatsorsuutigilluinnarlugu.