Kujallermi Siumup gruppia: Aalisarneq uranimisiornerlu tamaasa tapersersigit
IA-meersoq Aqqaluaq B. Egedep kujataani aalisarneq samminerullugu aatsitassanik qaqutigoortunik piiaanissaq Naalakkersuisut tunulliuttariaqaraat isumaqaraluartoq, taamaattoq Kommune Kujallermi Siumup gruppria isumaqarpoq suliat taakku arlaannaalluunniit imminut mattutinngitsoq.
Kuannersuarni aatsitassanik qaqutigoortunik uranimillu piiaanerup kujataani aalisarnerup ineriartortinnissaanut mattussisariaqanngilaq, pingaartumik Narsami.
Kommune Kujallermi kommunalbestyrelsemi Siumup gruppia taama isumaqarpoq.
Aqqaluaq B. Egede sapaatip akunnerata siuliani nalunaaruteqarpoq isummerluni, Naalakkersuisut kujataani aalisarnermik ukkassinerusariaqartut, Kuannersuarmilu aatsitassanik qaqutigoortunik piiaanissaq tunulliunneqartariaqartoq.
Greenland Mineralsip sumiiffimmi avatangiisinut sunniutissanut nalunaarusiaminik naammassinnilluinnalernini martsip naalernerani nalunaarutigereeraalu, uran pillugu oqallinneq aallarteqqilerpoq.
- Raajaleriffik Kuannersuarnilu aatsitassarsiorfik isumaqarpunga imminnut arlaanaatigulluuniit mattutinngitsut. Ataatsikkummi ingerlanneqarsinnaasimassanngippata taava ulorianartunik aatsitassarsiorfik akuerineqarsinnaanngitsumik peqarsimassaaq.
Aatsitassanummi inatsit paatsoorneqarsinnaanani allaqqasoqarmat: ”Pinngortitamut,
avatangiisinut inuillu peqqissusaanut akornutaassanngitsoq”. Tamanna tamanit paatsoorneqarsinnaanngilaq. Akornusiisussatut inissisimappat tamanit
akuerineqarnavianngilaq, Kommune Kujallermi Siumup gruppiani siulittaasoq Josef Petersen tusagassiutinut nalunaaruteqarluni allappoq.
Aalisarneq ineriartortinneqarli
Gruppimi siulittaasoq, aamma teknikkimut avatangiisinullu ataatsimiititaliami siulittaasoq erseqqissaavoq, aalisarneq ineriartortinneqartariaqartoq, oqaannarnermilu tamanna unittariaqanngitsoq.
- Aalisartut oqaloqatigisartakkagut unnersiuutigisaqaat, kujataani Qaqortup avatinnguani
raajanik kalillatsiaraangamik pisaqarluartartut. Tamakku kujataanut
tulaassorneqarlutik suliffissualiortoqarsinnaappat suliffippassuarnik sungiusimasatsinnik
pilersitsilertortoqarsinnaagaluarpoq, allappoq.
Josef Petersen tusagassiutinut nalunaarummini ilanngullugu erseqqissarpaa, raajanik tunisassiorfik tamanit kissaatigineqartoq.