Skip to main content

Kujallermi pisortat arlallit soraarsimasut

Kommuni Kujallermi ingerlatsivinni pisortat marluk pisortaanerlu soraarsimapput. Borgmesterinngorlaap Stine Egedep soraarsitsiortortoqarsimanersoq imaluunniit atorfilittat allanik namminneq suliffittaarusussimanersut uppernarsarusunngilaa.

Kommuni Kujallermi ingerlatsiviit sisamat pisortaagallartunik maannakkut ingerlanneqarput, aamma pisortaanerugallartumik atorfinitsitsisoqarsimavoq. Inuussutissarsiornermut Suliffeqarnermullu Ingerlatsivimmi aamma Teknikkimut Avatangiisinullu Ingerlatsivimmi pisortat piffissami kingullermi soraarsinneqarsiamanngikkunik namminneerlutik suliunnaarsimapput.

Borgmesterip sulianut sulisunut tunngassuteqartut oqaaseqarfigerusunngilai, soraarartulli suliamut attuumassuteqannginnerarpai.

- Suliat ataasiakkaat pillugit oqaaseqarsinnaanngilanga. Sulisut taarseraannerpassui nalaattornerinnaavoq, allamik oqaaseqarsinnaanngilanga, Stine Egede (IA) oqarpoq.

Århusimit ikiortissarsiorniartoq

Kommunip ingerlatsivinni marlunni pisortat taarsernerisa saniatigut pisortaagallartoq aamma taarsersimavaa. Dorthe Bistrup 2020-mi juulip qaammataani pisortaq Kim Dahl toqukkut qimagumat kommunimi pisortaagallartutut atorfinitsinneqarsimavoq.

Kommunimi pisortanngunngikkallarami Atuarfeqarnermut Meeqqeriveqarnermullu ingerlatsivimmi pisortaasimavoq. Stine Egedep ilsimatitsissutigaa, Dorthe Bistrup piffissami sivisuumi Nuummi allanik suliffissarsiorsimasoq, taamaammallu kommuni pisortaanerugallartutut tunuarsimasoq. Maannalu allattoqarfimmi pisortap Max Heilmann Larsenip Dorthe Bistrup taarsersimavaa.

- Illoqarfittut ikinngutigisatsinnit, Arhusimit ikiortissarsiorniarpugut. Neriuutigaara ullut 14-it ingerlaneranni pisortaanissarsiumaarluta. Pisortaaninngorallartussaq kommunimi pisortassamik eqqortumik pissarsinissatta tungaanut atuutissaaq, Stine Egede oqarpoq.

Soraarsitsiortortoqanngitsoq

Borgmesterip oqaatigaa kommunip allaffeqarfiani soraarsitsiortortoqanngitsoq. Borgmesterip qineqqusaarnerup nalaani arlaleriarluni oqaatigisarpaa, kommunip allaffeqarfiani saliisoqassasoq.

- Kommunimi soraarsitsiortortoqanngilaq. Qineqqusaarnermi oqaatigineqarsimasunut taakku attuumassuteqanngillat. Ingerlatsivinni pisortat taarsersorneqarnerat nalaattornerinnaavoq, Stine Egede Sermitsiaq.AG-mut oqarpoq.

Kommunimi pisortaanertut atorfiit assigiinngitsut sisamat qinersisoqanngitsorli inuttaqarsimanngillat. Taakku tassaapput pisortaaneq, pisortap tullia, isumaginninnermi pisortaq atuarfeqarnermilu pisortaq.

Kommuni pisortaanertut atuuffiit katillugit arfiniliusut pisortaanerugallartunik maanna ingerlanneqarput. Pisortat kommunip nittartagaani allattorsimasut ukuupput:

  • Pisortaanerugallartoq, Max Heilmann Larsen
  • Pisortaanerup tullerigallagaa, Kim Rosendahl
  • Teknikkimut Avatangiisinullu Ingerlatsivimmi pisortaagallartoq, Josef Kreutzmann
  • Kulturimut, Sunngiffimmut Pinaveersaartitsinermullu Ingerlatsivimmi pisortaq, Mikael Mansi Rasmussen
  • Isumaginninnermut Ingerlatsivimmi pisortaagallartoq, Arnaraq Dorph
  • Atuarfeqarnermut, Meeqqeriveqarnermut Nutaaliornermullu Ingerlatsivimmi pisortaagallartoq, Ruth Jakobsen
  • Inuussutissarsiornermut Suliffeqarnermullu Ingerlatsivimmi pisortaagallartoq, Poul Jørgensen
  • Aningaasaqarermut Pilersaarusiornermullu Ingerlatsivik, Kim Rosendahl

Stine Egedemit ilisimatitsissutigineqarpoq, pisortatut atorfiit tamarmik inuttalerneqarpata, politikkikkut anguniakkat aallartisarlugit suliarineqarlutillu atuutsinneqalissasut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER