Kujallermi imaatigut angallassinissamut allagartaqanngitsut angallassisartut
Kujataani ilaasunik angallassinissamut allagartaqanngitsut umiatsiaaqqanik umiatsianillu matoqqasunik angallassisarnerat nalinginnaaqaaq. Takorniariartitsisartut ajutoortoqartinnagut ajornartorsiutip eqqumaffigineqarnerunissaa kissaatigaat, politiinullu aamma søfartsstyrelsimut saaffiginnissimallutik.
Aqqutissaq - Qaqortoq, Narsaq, Narsarsuaq il. il. pillugu facebookikkut gruppi 5.700-t sinnerlugit ilaasortaqarpoq. Inuit Qaqortumiit Narsarsuarmut imaluunniit Nanortalimmiit Qaqortumut Narsamulluunniit kullorsorusukkaagamik allaffigisinnaasaat.
Aqqutissaq atorluarneqartarpoq, aamma maanna juullilernerani atorluarneqarpoq, ullunilu silap unerisimanngiffiini inuit ilaat Narsap Qaqortullu akornanni, inersimasumut 200 koruuninik meeqqamullu 13-it inorlugit ukiulimut 100 koruuninik akiliisillugit angallanneqartarlutik.
- Tamanna nalinginnaalluartuuvoq. Inuit ilaasa oqaluttuaraat umiatsiami ataatsimi inuit qulinik amerlanerusartut. Umiatsiaaqqami ammasumi ilaasut 16-it Qaqortumut tikittut pillugit assiuteqarpugut. Taakku arlaannaalluunniit annanniuteqanngillat aamma meeqqanik ilaasoqarput, Anguteeraq Høegh-Olsen Sermitsiaq.AG-mut oqaluttuarpoq, nangillunilu:
- Tamanna ilungersunartuuvoq. Taamak amerlatigisunik ilaasoqarlutik ajutuussagaluarpata, inuppassuit annaasussaavagut. Taamaammat Kujataani taamatut angallassisoqartarnerata nakkutigineqarnissaa kissaatigaarput, Anguteeraq Høegh-Olsen oqarpoq.
Akiligassinneqarlunilu ukiuni marlunni parnaarussaasoqarsinnaasoq
Anguteeraq Høegh-Olsenip takornariartitsisartut allat peqatigalugit, ilaasoqarnissamut akuersissuteqarani umiatsiaaqqanik angallassisoqartarnera unitsinniarlugu aasaq politiinut saaffiginnissimavoq. Saaffiginnissutaalli ajoraluartumik suliassanngortinneqarsimanngilaq, politiit isumaqarmata tigussaasumik nalunaaruteqartoqarsimanngitsoq. Politiilli ilisimatitsissutigaat, inuussutissarsiutigalugu imaatigut angallassinissamut malittarisassat unioqqutinneqarnerat akiligassiinermik imaluunniit ukiut marluk angullugit parnaarussaanermik kinguneqarsinnaasut.
- Inuussutissarsiutigalugu imaatigut angallassinissamut piumasaqaatit naammassisimanngikkukkit imaatigut angallassinissamut inatsit unioqqutissavat, taamalu akiligassinneqarlutillu ukiut marluk angullugit pineqaatissinneqarsimasunut inissiisarfimmiittussanngortinneqarsinnaavutit, vicepolitiinspektøri, Johan Westen Sermitsiaq.AG-mut oqarpoq.
Anguteeraq Høegh-Olsenip oqaatigaa, Greenland Sagalands, 60 North, South Greenland Boat Charter, Polar-tut aamma Diskoline ajornartorsiut pillugu politiinut allagaqarsimasut.
- Søfartsstyrelsenimut saaffiginninnitta kingorna allagaqarpugut. Uanga akisussaaffik tigusimavara allakkallu politiinut tunniullugit, tamannali iluaqutaasimanngilaq. Imaatigut taamatut angallassisoqartarnerata nakkutigineqarnissaa pisariaqarpoq. Ajutoortoqartinnagu oqatussanut saaffiginnissimavugut. Umiatsiaararpasuit amerlasuunik ilaasoqarlutik angalasarput, Anguteeraq Høegh-Olsen erseqqissaavoq.
Inuit sunngiffimminni angalasartunut ilaaqquneqanngitsut
Imaatigut ilaasoqarluni angallassisoqartinnagu malittarisassat aalajangersimasut naammassineqartussaapput. Umiatsiaq atorneqartussat ilaatigut akuersissutigineqartussaavoq, angallallu isumannaallisaanermit pisariaqartinneqartunik atortoqartussaalluni.
-Sunngiffimminni angalasartut soorunami akuersissummik peqaratik inuussutissarsiutigalugu angallassinnginnissaannik kaammattorpavut, tamannami inerteqqutaavoq, aamma isumannaallisaaneq eqqarsaatigalugu inuit inuussutissarsiutigalugu angallassisartunik atuisarnissaannik kaammattorpavut, Johan Westen oqarpoq, nangillunilu nassuiaatigalugu:
- Taamaallaammi angallat ilaasoqarnissamut akuerisaasimasup ilaaffigineqarneratigut qulakkeerneqarsinnaapput, angallatip isumannaallisaanermut pisariaqartinneqartunik atortoqarnissaa, angallammik aqutsisup ikiueqqaarnermi pisariaqartinneqartumik ilinniartinneqarsimanera, aamma angalanermi ajutoortoqarneranut atatillugu taarsiiffigitinnissamut piumasaqaateqarnissamut pisinnaatitaanerit, vicepolitiinspektøri naggasiivoq.