Kujallermi borgmesterip tuniluuttoqalersinnaanera ernumagivaa

Kommune Kujallermi illoqarfinni marlunni nunaqarfimmilu ataatsimi tunillatsissimasunik paasisaqartoqarpoq. Pissutsit ernumanarput, pingaartumik akiuussutinneqanngitsut amerlammata, borgmester oqarpoq.

Qaqortumi marlunnik, Narsami ataatsimik Narsarsuarmilu ataatsimik coronavirusimik tunillatsissimasoqarpoq.

Kommune Kujallermi borgmesterip tunillaassuuttoqaleratarsinnaaneranik aarlerisaarisoqarnera ernumanartoqartippaa:

- Soorunami nuanninngilaq, ernumaammernaqaaq. Aamma neriunnaqaaq inuit angalasussat maleruaqqusanik malinnissasut innuttaasullu killilersuutinik ataqqinnissasut tunillaassuuttoqalernissaa pinaveersaarniarlugu, Kommune Kujallermi borgmester Stine Egede Sermitsiaq.AG-mut oqarpoq.

Akiuussutissalertissimanngitsut amerlanerat ernumanarpoq

Nunatta nakorsaaneqarfia siornatigut ernumalluni nalunaaruteqarsimavoq kujataani akiuussutissalertissimanngitsut amerlanerat pillugu. Innuttaasut 18-ileereersimasut pingasuugaangata marluk aprilimi akiuussutissalertissimapput, sinnerilu kapitissimanatik.

Immikkut akiuussutissalersueqqinnissamik suliniuteqartoqaraluarpoq, kapitikkiartortulli amerlanerungaarsimanngillat. Tamanna borgmesterip ajuusaarutigaa.

- Soorunami uggornartorujussuuvoq ikippallaat kapitissimammata. Innuttaasut akiuussutissamik kapitinnissaannut aammaarluta kaammattorumavakka. Akiuussutissalertissimanngitsut amerlappata peqqinnissaqarfik artukkertoorneqaratarsinnaavoq, Stine Egede oqarpoq.

Taanna oqaluttuarpoq tunillaassuuttoqarnerani sulisunik tunillatsittoqarsimatillugu suliffeqarfiit ilaatigut aamma matusariaqalersinnaaneri eqqarsaatigineqartariaqartoq.

Pisortat allaffiinik matusigallarneq

Sisimiuni tunillaassuuttoqaratarsinnaanera aarleqqutigineqarmat pisortat allattoqarfii innuttaasunit orniinnarneqarsinnaajunnaarput. Aamma taamaappoq Kommune Kujallermi.

- Utoqqaat illuannut pulaartoqarsinnaanngikkallarpoq. Inunnik isumaginnittoqarfik aamma ornigulluni saaffiginninnernut matugallarpoq. Kommunimi illoqarfinni tamani Sullissivimmut saaffiginninneq matugallarpoq, pinartoqartilluguli isumaqatigiissuteqareernikkut ornigunnissat akuerineqassallutik, tassanili 2 miiterimik ungasissuseqarnissaq ataqqeqquneqarpoq, Stine Egede nassuiaavoq.

Taakku saniatigut Kommune Kujallermi innuttaasut angalavallaannginnissaannik borgmesteri kaammattuuteqarpoq.

- Angalasoqarnerani tunillaassuunneq siaruaatipallassinnaavoq. Naak Naalakkersuisut angallannermut killilersuinngikkaluartut, taamaattoq kommunimi angallannerup unikaallatsinneqarnissaa kaammattuutigaara. Naluarput qaqugu tunillatsittoqaqqissanersoq, taamaammat tunillaassuunneq siarualertortoorsinnaavoq, Stine Egede oqarpoq.

Powered by Labrador CMS