Kujallermi borgmesteri: Aatsitassarsiorfiit suliffissanik pilersitsissapput
Kommune Kujallermi borgmesterip Kiista P. Isaksenip ukiumi nutaami pisussat qilanaarai. Aatsitattarsiorfiit kujataani piiaanissamut akuerineqarnissaat borgmesterip neriuutigaa
- Kujataani aatsitassarsiorfiit suliffinnik assigiinngitsunik pilersitsisussaammata ilungersorluta anguniartuarparput kujataani aatsitassarsiorfiit piareersimasut piaarnerpaamik qalluinissamut akuersissummik tunineqarnissaat.
Kommune Kujallermi borgmesteri Kiista P. Isaksen ukiortaami oqalugiaammini ilaatigut oqarpoq.
Aatsitassat pillugit niuffatitsinissarsuaq
- Augustip qaammataani Kommune Kujalliup, Tanbreezep, Naalakkersuisullu akornanni isumaqatigiissutigineqarpoq suliassamut suleqatigiinnissamut isumaqatigiissut IBA pillugu isumaqatiginninniarnerit aallarteqqinneqassasut. Taamaasilluni Killavaat Alannguanni pinngoqqaatinik qaqutigoortunik qalluinissamut akuersissummik tunniussisoqarnissaa qanilliallattutut nalilerneqarpoq.
- Aatsitassaqarneq eqqarsaatigalugulu qilanaarisatta ilagaat Qaqortumi augustip qaammataani aatsitassat pillugit niuffatitsinissarsuaq isumasioqatigiinnertalik – soqutigisaqaqatigiimmi amerlasuut ataatsimoornerat tamatigut pissarsiffiulluartarmat, borgmesteri ilisimatitsivoq
Tikikkuminarnerulissasoq
Ukiuni tulliuttuni kujataani ineriartoqqinnissaq erinigaa, tassami Qaqortumi mittarfittarnissap kingunissai isumalluarfigimmagit.
- Mittarfittaarnissap sanaartorneqarnissaani pilersaarusiorneqarnera inerisarneqaleruttorpoq, ukiorlu manna qaartitseqqaarnerit piusussat qilanaarnaqaat. Mittarfittaarnikkut kujataata tikikkuminarnerulernera takornariaqarnikkut inuussutissarsiornikkullu ineriartortitsinissaq ammaanneqassapput, borgmesteri ilaatigut oqarpoq.