Kujallermi atuarfiit: Ilinniartitsisut qaangiuttoortariaqartarput
Kommuni Kujallermi illoqarfiit nunaqarfiillu tamarmik meeqqat atuarfiini ilinniartitsisussaaleqiffiupput. Nanortalimmi ilinniartitsisut katillugit qulingiluat, Qaqortumi qulingiluat Narsamilu tallimat amigaatigineqarput. Nunaqarfinni ilinniartitsisut aqqaneq-marluk amigaatigineqarlutik.
Nanortalimmi ilinniartitsisut 14-it atorfeqarput, taakku ilinniartitsisunik amigaateqartoqarnera pissutigalugu nalinginnaasumik qaangiuttoorlutik sulisarput. Illoqarfimmi annertuumik ilinniartitsisussaaleqisoqarpoq:
- Nanortalimmi ilinniartitsisuusugut ikittunnguungatta, ilinniartitsisutut amigaatigineqartut qulingiluat timit ilinniartitsinermi atugassaraluat matussuserniarlugit, maanna ilinniartitsisuusut qaangiuttoortariaqartarput. Qasutitsinaveersaarnissat uippakajaartitsinaveersaarnissarlu pinaveersaartinniarneri ilungersunartaqaaq, Nanortalimmi atuarfiup pisortaa Vivi Kleist oqarpoq.
Danskisut fysikkimilu ilinniartitsisut ataasiinnaasut
Pingaartumik oqaatsinik ilinniartitsisarneq ilinniartitsisussaaleqinermit eqqugaaqqavoq.
- Danskisut fysikkimilu ilinniartitsinermi ataasiinnarmik ilinniartitsisoqarpoq. Danmarkimit danskisut tuluttullu ilinniartitsiussaq tikeqqammerpoq. Taamaammat maannakkut marlunnik tuluttut ilinniartitsisoqalerpugut, Vivi Kleist oqarpoq.
Nunami illoqarfiit kujasinnerpaartaanni atuartut katillutik 168-iupput. Ilinniartitsisussaaleqineq matussuserniarlugu atuarfimmi pisortaq sakkortuumik pingaarnersiuisariaqartarpoq.
- Pingaarnersiuisariaqartarpunga. Atuartut akulliit avinneqartarneranni ilinniartitsisoqanngilagut, naak meeqqat ilaasa assersuutigalugu matematikkimi ikiorneqartarnissartik pisariaqartikkaluaraat. Aamma atuakkat ilinniartitsissutissat ajunnginnersut pillugit nakkutilliisussamik atuakkanik atorniartitsisoqanngilagut. Soorluttaaq kikkut tamat atorniarfigisinnaasaannik atukkanik atorniartitsisartoqanngitsoq. Kikkut tamat atorniarfigisinnaasaanni atuakkanik atorniartarfimmik aallartitsisinnaanngivippugut, Vivi Kleist oqaluttuarpoq.
Aaqqiissutaasinnaasut nassaariuminaatsut
Vivi Kleistip ilinniartitsisut ikittunnguullutik ilinniartitsisut amigaataasut tiimissaat matussuserniarlugit nalunaaqquttap akunnerpassuini sulisartut nersualaarpai. Ilinniartitsisut qaangiuttoortarnerisa saniatigut annertuallaamik piumasaqarfigineqartartut atuarfimmi pisortaq isumaqarpoq:
- Avataanit annertuumik tatineqarsimavugut. Atuartut karakteeriisa qaffanneqarnissaannik piumasaqartoqarpoq aamma angajoqqaat ilinniartitsisullu suleqatigiinnerunissaat piumasaqaataalluni. Taamalli ikitsigiuaannartilluta aamma ilinniartitsiussanik amigaateqartuaannartilluta ajornartorsiutit imaaliallaannaq aaqqiiffigisinnaanngilagut, Vivi Kleist oqarpoq, nangillunilu:
- Ilinniartitsisut aqutsisullu tamaviaarput. Ikaarsaariarnermi misilitsittarneq eqqarsaatigalugu, oqaatsitigut ilinniartitsisut annertuumik amigaatigaavut. Ilinniartitsisut danskisut tuluttullu oqalussinnaasut atortarpavut, danskisulli tuluttullu ilinniartitsinissat fagini taakkunani ilinniartitsisutut naammassisimasunit ingerlanneqartariaqaraluarput, Nanortallip atuarfiani pisortaq oqarpoq.
Vivi Kleistip erseqqissaassutigaa, specialklassini ilinniartitsisussanik pissarsiniartarneq aamma ajornartorsiutaasartoq.
Ungasianit ilinniartitsineq ilinniartitsisutullu angalasartut
Kujataani katillugit aqqanilinnik nunaqarfeqarpoq, 30-llu sinnerlugit savaateqarfeqarluni. Ilinniartitsisut arfineq-pingasut taakkunani ilinniartitsisarput, nunaqarfinnili ilinniartitsisutut ilinniagalinnik aqqanilinnik amigaateqartoqarluni. Nanortalimmi ilinniartitsisutut atorfiit arfineq-pingasuugaluartut ataasiinnaq ilinniartitsisuuvoq.
- Nunaqarfitsinni ilinniartitsiussanik pissarsiniarneq ajornartupilussuuvoq. Nunaqarfinni atuartorpassuit ikaarsaariarnermi misilitsittarnerisa takutippaat, illoqarfimmut nuullutik ottendeklassimi atualernissamut piareersimasanngitsut. Pingaartumik danskisut, tuluttut matematikkimillu ingerlatsisinnaaneq eqqarsaatigalugit.
Vivi Kleistilli ungasianit ilinniartitsisarnerup aallartinneqarsimanera nuannaarutigaa. Ilinniartitsisutut angalasartut kommunimi angalaarnerminni ilinniartitsisut atuartullu ipadimik qanoq atuisoqarsinnaaneranik ilinniartitsisarput.
- Ipad atorlugu ungasissumik ilinniartitsisarneq aallartinneqarnikuuvoq. Taanna atorlugu danskisut tuluttullu ilinniartitsisoqartarpoq, tamannalumi nunaqarfinni meeqqanut nuannaarutaalluartarpoq. Qassiarsummit ungasissumit ilinniartitsisarnerup aallartinneqarsimanera pitsaasuuvoq. Narsami aamma ungasissumit ilinniartitsisoqartarnissaa qanittukkut aallartinneqassaaq. Ilinniartitsisutut angalasartut ipadip ilinniartitsinermi qanoq atorneqarsinnaanera ilinniartitsissutigisarpaat. Tamanna piffissami sivitsulersumi ingerlanneqartareerpoq, atuarfimmi pisortaq Vivi Kleist oqaluttuarpoq.
Ilinniartitsisut amigaatigineqartut amerlassusaat:
Narsaq:
- Ilinniartitsisut 16-it atorfeqarput
- Ilinniartitsisut tallimat amigaataapput
- Tiimelærerit: sisamat
- Minnernut ilinniartitsisut: sisamat
Qaqortoq:
- Ilinniartitsisut 38-t atorfeqarput
- Ilinniartitsisut qulingiluat amigaataapput
- Tiimelærerit: sisamat
- Minnernut ilinniartitsisut: sisamat
Nanortalik:
- Ilinniartitsisut 14-it atorfeqarput
- Ilinniartitsisut qulingiluat amigaataapput
- Timelærerit: marluk
- Minnernut ilinniartitsisut: ataaseq