Kujallermi akiliuteqarnissamut atortup nutaap namminersorlutik suliffeqarfiutilinnut akiliuteqarniarneq kinguaattoortippaa
Kommuni Kujalleq Kujataani suliffeqarfinnut arlalinnut akiliisimanngilaq. Kommunip aggustip naanani akiliuteqartarnissamut atortoq nutaaq atuutsilermaguli akiliuteqarniarneq ajornartorsiutaasimavoq.
Akiligassat 300-t akilerneqartinnagit Kommuni Kujallermi akiliuteqarnissamut atortumi nutaami nammineq suliarineqartariaqarput. Kommunip assersuutigalugu Nanortalimmiittumi Hotel Kap Farvelimiissimanermut akiligassat katillugit 68.000 koruuniusut suli akilersimanngilai.
- Kommunip unnuisimanernut nerisaqarsimanermullu akiligassat aggustip 26-anili suli akilersimanngilai. Suliffeqarfiutiga uanga ernumaginngilara, suliffeqarfiilli mikinerit allat akiligassatik suli akilertartussaavaat, Hotel Kap Farvelimik piginneqataasoq Per Lund Nielsen oqarpoq, nangillunilu:
- Kommunip suliffeqarfiuteqartuusugut ilisimatissimasuuppatigut qujanassagaluarpoq, ilisimatinneqarsimasuuguttami tamanna eqqumaffigisimassagaluarparput. Kommunimiilli tusagaqarsimanngilagut, Per Lund Nielsen oqarpoq.
Kommuni Kujallermi aningaasaqarnermut pisortap Kim Rosendahlip oqaluttuaraa, kommunimi sulisut akiligassat akilerneqarnissaat sulissutigigaat, aamma kommunip akiliuteqarnissamut atortoq nutaaq pillugu suliffeqarfiit attavigisimagai.
- Atortoq nutaanngitsoq atorlugu akiliuteqartarnerput aggustip 28-ani unitsipparput. Sulisutta atortoq nutaaq aqqutigalugu akiligassanik akiliuteqarnissaq tamaviaarlutik sulissutigaat. Akiligassat akilerneqassappata GLN-normoqartoqartariaqarpoq. Pingaartumik suliffeqarfiit namminersortut atortumit nutaamit eqqorneqarsimapput, Kommuni Kujallermi aningaasaqarnermut pisortaq Kim Rosendahl oqarpoq.
GLN tassaavoq ”Global Location Number”. Normu aqqutigalugu ingerlatsiviit, suliat, inatsisit naapertorlugit ingerlatsiviusut digitalikkullu ingerlatsiviusut nassaarineqarsinnaapput.
Akileeqqusissutit kommunimut nassiunneqarsimasut
Sulifffeqarfiit arlallit akiligassiissutitik akileqqullugit nukingisaarutinik nassiussisimapput. Akiligassat ilaat annertuallaanngillat, ilaat en million koruunit angullugit allallu 300.000 koruunit angullugit annertussuseqarput.
- GLN-normut ikkussuuttussaavagut, ikkussuunneqareerpata assersuutigalugu teknikkeqarnermut immikkoortortamut akuerisassanngorlugit ingerlateqqinneqassapput, tamatumalu kingornatigut akiligassat akilerneqarsinnaanngussallutik. Atortorissaarutittat nutaap ilungersortippaatigut, piffissarli ungasinnerusoq qaangiuppat akiligassat sukkanerujussuarmik akilerneqarsinnaasalissapput, aamma digital aqqutigalugu isumagineqartalissallutik, Kim Rosendahl Oqarpoq.
Aningaasaqarnermut pisortap erseqqissaassutigaa, sapaatip akunneranut akiligassat 300-niit 600-t angullugit tiguneqartartut. Aningaasaqarnermut immikkoortortap isumaginnittoqarfimmut akiligassat akilerneqarnissaat isumagisarpaa, tamanna inatsisitigut pisussaaffiummat. Suliffeqarfiilli namminersortut atortorissaarutip nutaap atuutsilivinnissaanut nammagittartariaqarnerarpai.
Kommunimit naatsorsuutigineqarpoq, akiligassat kinguaattoorfiusimasut tamarmik sapaatip akunnerata ingerlanerani akilerneqassasut.