Kujallermi aalisarneq pillugu isumasioqatigiinneq iluatsilluartoq
Kommune Kujallermi aalisarneq pillugu ulluni marlunni isumasioqatigiittoqarpoq. Isumasioqatigiinneq kujataani aalisarneq eqqarsaatigalugu ajornartorsiutit qitiusut ukkatarineqartut politikerit isumaqarput.
Unammilligassat arlallit aqqusaarneqaqqaartariaqarput kujataani aalisarneq ineriartortinneqassappat. Tamanna Kommune Kujallermi isumasioqatigiinnermi pingasunngornermi sisamanngornermilu ingerlanneqartumi erserpoq.
Isumasioqatigiinnermi ilaatigut KNAPK-mi siulittaasoq, aalisartut, kommunimi politikkerit suliffeqarfiillu peqataapput. Sofia Olsen, inuussutissarsiornermi suliffeqarnermilu ataatsimiititaliami siulittaasup isumasioqatigiinneq iluarisimaarpaa.
- Ippassaq ullumilu eqqartukkagut massakkut katiterlugit allattorpagut. Ilaatigut kujataani aalisarneq pitsanngorsarneqarnissaa eqqarsaatigalugu Aalisarnermut Piniarnermullu Naalakkersuisoqarfimmut allakkiorluta, Sofia Olsen (IA) oqarpoq.
Isumasioqatigiinneq aamma illuatungiliuttuniit iluarisimaarneqarpoq. Partiili aalisakkat kujataata imartaani aalisarneqartut Kujallermi tunineqartariaqartut isumaqarput.
- Soqutigisallit tamaasa peqatigalugit isumasioqatigiinneq Siumumiit iluarisimaaqaarput. Kujataanimi aalisarneq massakkut naqqaniinerpaaffimminiippoq. Aalisartunullu aporfeerarpassuaqarpoq inerisarsinnaaneranut annertuumik killiliisunik, Margrethe Thårup Andersen, inuussutissarsiornermi suliffeqarnermilu ataatsimiititaliami ilaasortaasoq oqarpoq.
Avataaniit ikiorneqartariaqarneq
Isumasioqatigiinnermi ilaatigut Grønlandsbanken aalisartut ineriartornissaanut aningaasaliisinnaaneranut tunngatillugu saqqummiussivoq. Kujataani aalisarneq eqqarsaatigalugu ineriartortitsisoqassappat Naalakkersuisut immikkut tapersersuisariaqarneranut tunngatillugu isumasioqatigiinnermi allakkiamik allaaserinnittoqarpoq.
- Kujataani aalisarneq ingerlallualissappat aningaasaliissutit assigiinngitsut pisassiissutinullu tunngasut Naalakkersuisuniit immikkut isiginiarneqarumaartut qineqqusaarutaanikuuvoq. Tamannalu Kommune Kujallermi atorluarusupparput, Sofia Olsen oqarpoq.
Kujataata imartaani raajat saarulliillu aalisarneqartarput. Aalisarneqartullu Nuummut ilaatigut tunineqartarlutik kommuninut allanut suliffissaqalersitsisunik.
- Kujataata imartaani aalisariutit aalisartarput, kisiannili Kommuneqarfik Sermersuumut tunisiartortarlutik. Maani kujataani tunisisoqartalernissaa ilaatigut noqqaassutigerusupparput. Suliffissat kujataani amerlisarneqartariaqarput aalisartunullu annertunerusumik inerisaassariaqarpugut, Margrethe Thårup Andersen (S) oqarpoq.
Aalisarneq pillugu isumasioqatigiinneq Innovation South Greenlandimit Kommune Kujallermiillu aaqqissorneqarpoq.