Skip to main content

Kujalleq: Utaqqeqqissinnaajunnaarpugut

Ukiut qulit missaat qaangiuppata Kommune Kujallermi innuttaassut 1000-inik ikileriaqqinnissaat ilimagineqarpoq. Tamanna allanngortinneqartariaqarpoq, borgmesteri oqarpoq

Septemberip qiteqqunnerani Kommune Kujalleq inuussutissarsiuteqartunut isumasioqatigiisitsivoq, isumasioqatigiisitsineq inuussutissarsiuteqartut kommunellu akunnerminni suleqatigiinnerat nukittorsarniarlugu aaqqissuussaavoq. Tamannalu inuussutissarsiuteqartunit soqutigineqarluarluni peqataaffigineqarpoq.

Kommune Kujalleq tusagassiutinut nalunaaruteqarpoq.

Isumasioqatigiinnermi ukiuni kingullerni qulini kommunemi inuussutissarsiornikkut ingerlataqartut inuillu kommunemi najugaqartut ikiliartuinnavissimanerat saqqummiunneqarpoq. 

Tamannalu piffissami aggersumi allanngortinneqanngippat ukiut qulit missaat qaangiuppata Kommune Kujallermi innuttaassut 1000-inik ikileriaqqinnissaat ilimagineqarpoq. Tamanna naatsorsueqqissaartarfiup kisitsisaataani takuneqarsinnaavoq, tassa 2018-imi innuttaasut 6500-t 2028-mi 5600-nngorniissaat ilimagineqarmat.

Kivitseqataarusussuseq

Kommune Kujalleq ineriartortinneqassappat, innuttaasullu ikiliartuinnassanngippatta inuussutissarsiornermik suliaqartut qanimut suleqatiginissaat pingaaruteqartorujussuusoq, borgmesteri Kiista P. Isaksen oqarpoq.

- Inuussutissarsiuteqartunillu suleqateqarneq nukittunerulersinniarlugu isumasioqatigiisitsinitinni inuussutissarsiornermut siunnersoqatigiinnik pilersitsinissamik siunnerfeqarpugut. Taamatut siunnerfeqarnerup takutiinnarpaa kommunitsinni inuussutissarsiuteqartut, kujataani inussuutissarsiuteqarnerup siuarsaaviginissaanut kivitseqataarusuttut, borgmesteri Kiista P. Isaksen tusagassiutinut nalunaarummi oqarpoq.

Sapiissuseqarnissaq

Inuussutissarsiuteqartut ineriartornissamut kivitseqataanissaminnut soqutiginnikkaluartut taammaattoq ukiuni arlaqalersuni Qaqortumi mittarfiliornissamik oqariartuuteqartarneq, Narsarsuullu mittarfiata qanoq pineqarnissaanik apeqqut Naalakkersuinikkut suliaqartunik aaliangiiffigineqartussaq kujataani inuussutissarsiuteqartut sumi inerisaaqqinnissaanik nalornisitsivoq.

- Naalakkersuisut sapiissuseqarnerusariaqarput maani Kommune Kujallermi aatsitassanik piianissamut akuersissummik tunniussinissaminnut. Piffissanngorpormi maani Kujataani inerisaaqqinnissaq. Killavaat alannguani aatsitassarsiornissaq pillugu misissuisoqareernikuuvoq, aatsitassarsiornerlu aallartippat suliffissat arlallit aamma pilersinneqartussaapput, tamannalu Kommunitsinnut, nunattalumi sinneranut ajunngitsumik nassataqartussaavoq. Pissusissamisoorsinnaanngilarmi kommune ineriartorusuttoq utaqqisiinnarlugu Naalakkersuinikkut suliaqartunik isiginnaaginnarneqassappat, borgmesteri oqarpoq.

Kaammattuut

Kujataani inuussutissarsiuteqartut ukiuni arlaqalersuni Qaqortumi mittarfiliortoqarnissaanik suliniut aamma Narsarsuarmi mittarfiup qanoq aaliangiivineqarnissaannut apeqqut inuussutissarsiuteqartunut nalornisitsivoq. Sumiiffimmi ineriartorfiusoq inuussutissarsiuteqartunut aningaasaliiffigissallugu orniginarnerpaasarpoq. Tamannalu piaartumik aaliangiiffigineqartariaqartoq Kommune Kujallermi borgmesterip kammattuutigaa.

- Qaqortumi mittarfiliornissaq nunatta karsianit aningaasaliiffigineqartussaq piaartumik pilersinneqarniartariaqartoq kissaatigaara, ukiummi qulit utaqqeqqinnissatsinnut akissaqanngilagut. Taamaattumik kujattaani mittarfiit pillugit Naalakkersuinikkut suliaqartut piaartumik aaliangiisariaqarput, Kiista P. Isaksen oqarpoq, naqissuserpaali Narsarsuup matuneqarnissaa kommunimit anguniagarineqanngimmat.

Nuup avataani ineriartortitsineq
Ineriartortitsisoqassappat Nuup avataani aamma ineriartortitsisoqartariaqartoq borgmesteri isumaqarpoq.

- Qaammatit marluk qaangiuppata misileraanissamut piffissaq taggineqartoq naammassissaaq, matumanilu silaannaap aalarulunneranik anorip aaliangersimasup misilerarneqarnissaa kisimi amigaataavoq. Kisianni tassa siorna novemberiminngaanniit anori aaliangersimasoq suli takkusimanngitsoq - Air Greenlandimit paasitinneqarpugut, taava qaammatit qassit, ukiulluunniit qassit utaqqeqqissagatta anori taanna utaqillugu? Misissuinerit naammassisariaqalerput neriuppungalu ukioq naatinnagu tamanna pisinnaassasoq. Kommunemi kujalleq misissuititsisoqarnissaanut 300.000 koruninik illuartitsereernikuuvoq, Kiista P. Isaksen oqarpoq nangillunilu.

- Nuup avataa aamma ineriartorfiusariaqarpoq. Sunami tamarmi Nuummi eqiterunneqartariaqanngilaq. Siammasinnerusumimmi ineriartortitsisinnaagutta nunatsinni kommunet kivitseqataasinnaavugut. Suliffeqarfippassuimmi Namminersornerullutik oqartussat pigisaat akileraaqataaffigalugit aningaasalersueqataavugut, taamannalu isiginnaaginnarnagu ineriartoqataarusuppugut. Matumanilu eqqaanngitsoorusunngilara kommunemut tapiissutsit 170 mio.-inik ikinnerunngitsut tunniunneqartartut suli amerlanerujussuusinnaagaluartut nalimmassaariaaseq kommune Kujallermut tulluarnerusoq atorneqaraluarpat, Kiista P. Isaksen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER