Kujalleq: Qassutikuniit paarnaniillu aningaasarsiorit
Suliniutit marluk piujuaannartitsisut pinngortitamut nunaqarfimmiunullu iluaqutaasinnaaasut kujataani aallartinneqarput. Aalisartut qassutikutik maanna Pilersuisumut tunniussinnaalerpaat innuttaasullu paarnanik nunianneq aningaasarsiorfigisinnaanngorlugu.
Kujallermi Innovation South Greenlandip Naalakkersuisut ukiumoortumik nunaqarfnnut aningaasaliissutaat piujuaannartitsisumik sulianut sulianullu allanut atussallugit aalajangiuppaat. Suliniut siulleq tassaavoq qassutikut tunniunneqarsinnaalernerat aappaalu tassaalluni paarnanik nunianneq.
Kujallermi nunaqarfinni innuttaasut maanna qassutikut ningittagakullu Pilersuisumut tunniusinnaalerpaat. Qassutikut atoqqinneqarsinnaanngorlugit nassiunneqartalissapput, soorlu illoqarfinni assigiinngitsuni maanna periarfissaareersoq. Qassutikut tunniunneqarsinnaalernerat piviusunngortinneqarpoq Kommune Kujalleq, Pilersuisoq aamma Qalut Vonin Nuummiittoq qanimut suleqatigiinerisigut.
- Innuttaasut qassutikunik puusiamik 861 literimik imaqarsinnaasumik tunniussigunik taava 2.500 koruunit Namminersorlutik Oqartussaniit nunaqarfinnut aningaasaliissutiniit aningaasannassinnaaapput. Puunik nunaqarfinnut tamanut nassiussinikuuvugut, maannalu aamma qassutikunik Alluitsup-Paaniit, Aappilattumiit, Saarlumiit og Ammassivimmiillu tunniussisoqareersimalerpoq, Innovation South Greenland-imi inuussutissarsiornermi siunnersorti Erik Kielsen oqarpoq.
Aningaasat Kommune Kujallermiit tunniunneqartassapput.
- Pilersuisup qassutikut tigoorartassavaat Qalut Vonin-imullu nassiullugit. Siunertarisimagaluarparput aningaasat nunaqarfiup aningaasaateqarfianut nakkartassasut, kisianni tunniussisoqarneq ajormat tunniussisoq nammineq aningaasat tigusalissagaat aalajangiupparput, Erik Kielsen oqarpoq.
Kujataaniit mamalaaq
Suliniut aappaa tassaavoq innuttaasut paarnanik aamma tunisaqalersinnaanerat. Nunaqarfinni innuttaasut paarnanik kigutaarnanillu nuniannerminni kilumut 45 koruunit imaluunniit 50 koruunit aningaasarsissutigisinnaanngorpaat.
- Nunaqarfinni innuttaasut paarnat kigutaarnallu assaminnik nuniataminnik Alluitsup
Paani Narsarmiinilu Pilersuisumut ukiaq manna tunisinnaangorpaat. Pilersuisup
paarnat kigutaarnallu Neqi A/S-imut kingusinnerusukkut nassiutissavaat. Taakkua
Neqi A/S-imiit marmeladeliarineqassapput, nutaamik maani Kujataaniit
nerisassaliarineqassallutik, Kujalleq taama allappoq.
Paarnat nunianneqarnerminiit akunnerni arfinilinni sivisunerpaamik pisoqaassuseqassapput, nuniaanik tunniussiffissat kingulliit; Narsarmijini oktobarip 14-ani Alluitsup-paani oktobarip 15-ani.
Suliniutit allat
Naalakkersuisut nunaqarfinnut aningaasaliissutaat allanut aamma atorneqassapput. Soorlu Narsarsuarmi ataqatigiisaarinermut tunngasumut, Qeqertaasamilu savaateqarfinnut tunngasumut, Ammassivimmi kartoffilinik naatitsinermut tunngasumut aammalu Saarlumi qisuit Nunatsinneersut atorlugit nioqqutissiassanut, Kommune Kujalleq allappoq.