Kujalleq: Angerlarsimaffiit tamarmik 2030 tikitsinnagu kuuginnartumik imeqalissapput
Kommune Kujalliup maajip aallaqqaataani nunarsuaq tamakkerlugu sulisartut ulluanni inissitsiternini naammassivaa, tassani Stine Egede borgmesteritut atorfeqalerpoq.
Arfininngornermi maajip aallaqqaataani Qaqortumi borgmesterinngortoq Stine Egede, Inuit Ataqatigiit, nuannaartorujussuuvoq. Borgmesteritut qinigaaneq innuttaasunit annertuumik tatiginnilluni nalunaarutitut misigaa, sulinerullu aallartinnissaa qilanaaraa.
Aviisi Sermitsiaq taama allappoq.
- Pisoq oqaluttuarisaanermut ilannguppoq, tassami kommunip oqaluttuarisaanerani Inuit Ataqatigiit borgmesteriutitaqarnikuunngisaannarput. Allannguisoqarnissaa innuttaasunit sakkortuumik kissaatigineqarnikuuvoq, nukiillu nukissallu annertuut akisussaafferujussuarlu uagutsinnut tunniunneqarput, tamannalu nuannaarlunga tulluusimaarlungalu tiguara. Innuttaasut annertuumik allannguisoqarnissaanik kissaateqarput, tamannalu tamatta malugisinnaasimavarput, Stine Egede avisimut Sermitsiamut oqarpoq.
Errorsisarfik imerlu kuuginnartoq
Nanortalimmi sumiiffinnilu allani amigaateqarfiusuni errorsisarfimmik sanaartortoqarnissaa suleqatigiinnut pingaaruteqarpoq.
- Ilaqutariit tamarmik errorsiveqanngillat, sumiiffiillu tamarmik kuuginnartumik imeqanngillat. Ajornartorsiutit taakku aaqqissavagut, kikkut tamarmik atisanik errorsisinnaalerniassammata. Taamaammat aallaqqaammut Nanortalimmi errorsisarfimmik sanaartussaagut. Sumiiffinnilu allani aamma sanaartortoqarnissaa periarfissaavoq, kisianni tamanna kingorna suliarissavarput, Stine Egede oqarpoq.
Kujataani angerlarsimaffiit tamarmik 2030-mi kuuginnartumik imeqarlutillu kuutsittakkanik perusuersartarfeqarnissaat, isumaqatigiissummi aamma allaqqavoq.
- Angerlarsimaffiit tamarmik kuuginnartumik imeqarnissaat pingaartipparput. Ajoraluartumik Kujataani sumiiffinni arlalinni taamaanngilaq. Angerlarsimaffiillu tamarmik kuutsittakkanik perusuersartarfeqarnissaat pingaartorujussuuvoq, periarfissaanngippat igittakkamik ikuallassinnaasumik. Taakkununnga pilersaarusiortoqarnissaa pingaaruteqarpoq, angerlarsimaffiit tamarmik tamanna angusinnaaniassammassuk, Stine Egede oqarpoq.
Aviisimi Sermitsiami atuarsinnaavatit kommunalbestyrelsep Kujallermi ukiuni sisamani tullerni anguniagassatut siunniussai: