Kujalleq: Amigartoorutit 13,5 millionit koruuninik annertussuseqarsinnaasut
Kommune Kujalliup ukiup naanerani 13,5 millionit koruuninik amigartooruteqarsinnaaneq aarleequtigaa. Immikkoortortaqarfiit tamaasa allaffissornikkut aningaasartuutit minnerpaaffissaminiitinniarsarissagaat, borgmesteri kaammattuivoq.
Kommune Kujalleq januarimiit apriilip tungaanut 2021-mi innuttaasut katillugit 45-t annaavai. Tamanna Naatsorsueqqissaartarfiup kisitsisaataani erserpoq. Tamannalu akileraarutitigut isertitat annikillineranik kinguneqarpoq maannalu ukiumoortumik nalunaarusiami amigartooruteqarsinnaaneq erserpoq.
- Immikkoortortaqarfiit tamarmik sukannersumik ingerlatsinissaat piumasaqaatigineqassaaq, naak ingerlatsiviit ilaat ernumananngikkaluartut. Kingunerlunngitsumik aningaasatigut inissiissagutta immikkoortortat tamarmik sukannersumik ingerlatsinissami peqataasariaqarput, borgmesteri Stine Egede, Inuit Ataqatigiineersoq oqarpoq.
Inunnik isumaginninnermi ajornartorsiutit annertuut
Innuttaasut 6.409-t apriilimi kujataani najugaqarput. Inunnik isumaginninnermi sipaarniartoqarsinnaanngitsoq borgmesterip oqaatigaa. Tamannalu immikkoortortaqarfinni allani malugineqarsinnaaratarsinnaavoq.
- Assersuutigalugu isumaginnittoqarfik inatsisinik annertuumik malitaqartunik aningaasalersuiffiusarpoq, ilaatigut saneqqukkuminaatsunik. Taamaakkaluartoq allatigut sukaterisariaqarnissaq saneqqunneqarsinnaanngilaq, Kommune Kujallermi borgmesteri Stine Egede oqarpoq.
Akiitsullit amerlasuut
- Eqqaaveqarnermut paaviaanermullu akiitsullit katillugit 88 millionit koruunit missaaniipput. Nutaattullu innuttaasut akiitsui saqqummiunneqartalissapput. Soorunami atilersorneqassanngillat, inunnik paasissutissanik suliarinnittarneq pillugu inatsit unioqqutissavarput, Stine Egede Sermitsiaq.AG-imut itisiliivoq.
Aningaasaqarnermut ataatsimiititaliaq qaammatit tamaasa ataatsimiitalissaaq, kujataani aningaasaqarneq qanimut malinnaaffiginiarlugu. Aningaasaqarnermut ataatsimiititaliaq ataatsimeereeraangami aningaasaqarnermi killiffik saqqummiunneqartalissaaq. Qinigaaffiup siuliani ukiumut sisamariarluni kommunip nittartagaatigut paasissutissiissutigineqartarpoq.
- Taama aalajangersimavugut Kommune Kujallermi aningaasatigut killiffik, minnerunngitsumik akiitsut qanoq inissisimaneri innuttaasut malinnaaffigisariaqarmassuk, Borgmesteri Stine Egede oqarpoq.