Kujalleq: 2022-mut missingersuut akuerineqarpoq - 30 millionit koruunit sipaarutigineqassapput
Kommune Kujalliup 2022-mut missingersuusiornermini 30 millionit koruunit sipaarutigissallugit aalajangiuppaa, kommunalbestyrelsilu aningaasaqarnerup ukiuni marlunni sukangasumik ingerlanneqarnissaa aamma siunniuppaa. Siumut missingersuusiornermut akerliuvoq.
Kommune Kujallermi kommunalbestyrelsi ulluni pingasuni ataatsimeeqqammerpoq, tassanilu ilaatigut missingersuut 2022-moortoq akuersissutigineqarluni.
Maanna kommunep suliniutini timitalerlugit aallartisarsinnaalerpai 30 millionit koruuninik sipaaruteqarlutik. Kujallermili illuatungiliuttut missingersuumut akerliupput, kommunimi 30 millionit koruunit kommunep immikkoortortaqarfiinni assigiinngitsuni sipaaruteqarniarpoq.
- Missingersuumut 2022-mut akuersaaqqataasinnaanngilagut 30 millionit koruunit suminngaaniit aaneqassanersut takusinnaanngitsigu. Soorlu 1,5 millionit koruunit inuussutissarsiornermi aaniarneqarpit, kisianni qanoq kinguneqassava? Inunnik isumaginninnermi 8 millionit koruunit aaneqassapput, kisianni ilisimanngilarput innuttaasunut sullissinermut qanoq kinguneqassanersoq. Taamatut aamma atuarfeqarnermi inissisimasoqarpoq. Sipaarutissat qanoq kinguneqartitsinissai ilisimanngilagut, Kista P. Isaksen kommunalbestyrelsit ataatsimiineranni taama oqarpoq.
Kommunalbestyrelsimi ilaasortat qulingiluaasut missingersuut akuerataa, arfinillillu akerliullutik.
Siumut sooq missingersuummut akuersaannginnersut borgmesterimit Stine Egedemit paasiuminaatsinneqarpoq. Siumumi kommunip aallartisarusutai tapersersorlugit oqartarsimammat.
- Paasisinnaanngilara sooq missingersuummut akuersaaqqataasinnaannginnersusi, tassami suliniutigut tapersersorlugit oqartarpusi. Aqqut kingullerpaaq atorsinnaasarput tassaavoq kassekredit-imiit aningaasanik aallerneq, kisianni kommuni aningaasanik taava taarsigassarsisariaqalissaaq, taannalu aqqut kingullerpaattut atorneqarsinnaasutut isigaara, borgmesteri Stine Egede (IA) oqarpoq.
Inuit Ataqatigiit kommunalbestyrelsimi 15-iusuni arfineq-pingasunik issiatitaqarpoq, Atassullu ataatsimik issiatitaqarluni.
- Naak sipaarniartoqartussaagaluartoq siunissami kommunip aningaasaqarnera ilorraap tungaanukarnissaa qulakkeerneqarmat Atassummiit tapersersorparput, Kim Ezekiassen (A) oqarpoq.